Тошкентда наркотик савдосига оид реклама тарқатган шахс ушланди

Тошкент шаҳрида гиёҳвандлик воситалари савдоси билан шуғулланувчи каналнинг рекламасини тарқатган шахс ушланиб, 37,5 млн сўм жаримага тортилди. Бу ҳақда пойтахт Ички ишлар бош бошқармаси хабар берди.

Қайд этилишича, ўтказилган суриштирувларда гиёҳвандлик моддаларининг тарқатилиши аниқланган. Мазкур иш билан шуғулланаётган 1985 йилда туғилган фуқаро ҳар бир рекламаси учун 2 минг сўмдан пул олаётганини ва ишни яқинда бошлаганини айтган.

Билдирилишича, ушбу ҳолат Жиноят ишлари бўйича Учтепа тумани судида кўриб чиқилган ва фуқаро Маъмурий жавобгарлик тўғрисидаги кодекснинг 56⁴-моддаси (гиёҳвандлик воситаларини, уларнинг аналогларини ёки психотроп моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш) билан айбли деб топилган.

Унга нисбатан базавий ҳисоблаш миқдорининг 100 баравари (37,5 млн сўм) миқдорида жарима жазоси қўлланган.

Эслатиб ўтамиз, аввалроқ Андижон вилоятидаги “Дўстлик” чегара божхона постида 56 килограмм кучли таъсир қилувчи “прегабалин” моддасини кир ювиш кукуни кўринишида олиб кирмоқчи бўлган шахслар қўлга тушган эди.