Toshkentda qariyb 11 mln dollarlik kripto-aktivlarni aylantirgan shaxs ushlandi

Toshkent shahrining Yunusobod tumanida qariyb 11 million dollarlik kripto-aktivlarning noqonuniy aylanishini amalga oshirgan shaxs ushlandi. Bu haqda poytaxt Ichki ishlar bosh boshqarmasi xabar berdi.

Qayd etilishicha, 2004 yilda Samarqand viloyatida tug‘ilgan fuqaro jinoiy faoliyatdan olingan mablag‘larni kripto-aktivlarga ayirboshlash orqali ularning kelib chiqish manbasi, haqiqiy egalari va moliyaviy harakat yo‘nalishlarini yashirish bilan shug‘ullanib kelgan. Dastlabki hisob-kitoblarga ko‘ra, u 10 million 976 ming AQSH dollari miqdoridagi kripto-aktivlarning noqonuniy aylanishini amalga oshirgan.

Tezkor tadbir davomida gumonlanuvchining Toshkent shahridagi vaqtincha yashash xonadonlari ko‘zdan kechirilgan. Natijada bir dona noutbuk, Wi-Fi router, 24 ta mobil telefon hamda 20 ta bank plastik kartasi ashyoviy dalil sifatida rasmiylashtirib olingan.

Mazkur holat yuzasidan O‘zbekiston Respublikasi Jinoyat kodeksining 278-8-moddasi (kriptoaktivlar aylanmasi sohasidagi qonunchilikni buzish) bilan jinoyat ishi qo‘zg‘atilgan. Hozirda tergov harakatlari davom etmoqda.

Eslatib o‘tamiz, avvalroq Jizzax viloyatida noqonuniy kriptoaktiv ayirboshlash bilan shug‘ullanib kelgan xorijlik talaba qo‘lga olingandi.