Тошкентда 13 та автобус йўналиши ҳаракати вақтинча ўзгарди

−

image

Тошкент шаҳрининг Юнусобод туманида BRT йўли қурилиши сабабли 13 та автобус йўналиши ҳаракатига вақтинча ўзгартириш киритилди. Бу ҳақда Тошкент шаҳар транспорт бош бошқармаси хабар берди.

Маълум қилинишича, кеча, 26 октябрдан бошлаб Амир Темур кўчасидаги транспорт воситалари учун асосий қайрилиш жойини таъмирлаш ишлари якунлангунига қадар вақтинча ёпилган.

Шу муносабат билан 5, 82, 83, 123 ва 124-сонли автобуслар Аҳмад Дониш кўчасидан Амир Темур кўчаси орқали қайрилмасдан, тўғри йўналишда ҳаракатланишда давом этади.

3, 6, 7, 25, 96, 119, 149 ва 175-сонли автобуслар эса Аҳмад Дониш кўчасидан Амир Темур кўчасига бурилиб, ҳаракатни давом эттиради ҳамда Шаҳристон метро бекати ёнидаги қайрилиш жойи орқали ортга қайтади.

Масъуллар йўлдаги ўзгаришлар сабабли вақтинчалик тирбандликлар юзага келиши ва автобуслар ҳаракат интерваллари ўзгариши мумкинлигидан огоҳлантирди. Йўловчиларга сафарларини олдиндан режалаштириш тавсия этилган.

Эслатиб ўтамиз, аввалроқ Тошкент шаҳридаги Шаҳрисабз ва Истиқбол кўчалари кесишмасида ҳаракатланиш чеклангани сабабли бешта автобус йўналиши вақтинча ўзгартирилгани ҳақида хабар берилган эди.


Rate Count

0

Rating

3

Rate this article

Share with your friends