Тошкентда эркак ҳамкасбини зўрламоқчи бўлди

Тошкентга бирга хизмат сафарига келган ҳамкасбини зўрлашга ва бўғишга уринишда айбланган эркакка 5 сутка қамоқ жазоси берилди. Бу ҳақда “Nemolchi” лойиҳаси хабар берди.

Маълум бўлишича, эркак ва унинг ҳамкасби хизмат сафари билан Тошкентда бўлган, улар спорт мусобақаларида иштирок этиш учун юборилган. 18 декабрдан 19 декабрга ўтар кечаси у бирга кечки овқат қилиш баҳонаси билан аёл яшаётган меҳмонхона хонасига кирган. Рад жавобини олгач, аёлга нисбатан шилқимлик қила бошлаган ва жинсий характердаги ҳаракатларни содир этишга уринган.

Судда аёл очиқчасига рад жавобини берганини, ҳеч қандай шароитда рози эмаслигини айтганини сўзлаб берган. Аёлнинг “розилик бергандан кўра, ўлганим афзал” деган сўзларидан кейин эркак уни каравотга йиқитиб, ёстиқ билан бўға бошлаган ва “ундай бўлса ўл” деган. Уни ушлаб қолишга уринишларига қарамай, аёл қочиб чиқишга муваффақ бўлган.

Судда тажовузкор айбини тан олиб, ўз ҳаракатларини ҳамкасбини “ёқтириши” билан изоҳлаган. Суд эркакни Маъмурий жавобгарлик тўғрисидаги кодекснинг 41-1-моддаси (Шаҳвоний шилқимлик) бўйича айбдор деб топган ва 5 сутка маъмурий қамоқ жазосини тайинлаган.

Эслатиб ўтамиз, аввалроқ Учтепа туманидаги туннелда аёлга шилқимлик қилган эркак 15 суткага қамалган эди.