Терма жамоа футболчисига нисбатан қўпол гапирган шарҳловчи узр сўради (видео)

“Спорт” телеканалининг рус тилидаги шарҳловчиси Отабек Жўраев Осиё кубоги чорак финалидан ўрин олган Қатар – Ўзбекистон ўйинидаги пенальтилар серияси давомида Зафармурод Абдураҳматовнинг муваффақиятсиз уринишидан сўнг қўпол гапиргани учун футболчидан узр сўради. Бу ҳақда шарҳловчи ўз Telegram саҳифасида маълум қилди. 

“Сўнгги чорак финалдан деярли икки кун ўтди. Стресс қўйиб юборди, ҳиссиётлар жойига тушди. Энди иштирокимиз ҳақида ўз фикрларим билан ўртоқлашсам бўлади, аммо бундан олдин менга энг муҳим бўлган нарсага эътиборимни қаратмоқчиман. Ўша ўйиндаги пенальтини назарда тутяпман. Зафармурод билан алоқага чиқдим. Узр сўрадим. Масала ёпилди. Қиёматга қолмади. Мана энди ўзимни яхши ҳис қилмоқдаман”, дейди Отабек Жўраев.

Маълумот учун, 20 ёшли Зафармурод Абдураҳматов Қаршининг “Насаф” клуби аъзоси ҳисобланади. У Қатар билан ўйиндаги пенальтилар сериясида Ўзбекистон миллий терма жамоасининг 4-зарбасини амалга оширди, бироқ уриниш самарасиз якунланди.