Telegram цензурани айланиб ўтиш учун протоколни янгилади

Telegram цензурани айланиб ўтиш учун ўз протоколини янгилади. Бу ҳақда мессенжер асосчиси ва эгаси Павел Дуров маълум қилди.

Унинг сўзларига кўра, блоклашларга қарши туришнинг янги технологиялари жорий этилган. Павел Дуров Россиядаги фойдаланувчиларга чекловлар шароитида ҳам сервисдан фойдаланиш имкониятини сақлаб қолиш учун иловани янгилашни тавсия қилган. Унинг айтишича, тақиқларга қарамай, фойдаланувчиларнинг “рақамли қаршилиги” туфайли Россия Федерациясида Telegram’дан фойдаланиш барқарорлигича қолмоқда.

“Кўпчилик одамлар аллақачон шундай қилаётганини кўришдан хурсандман. Ушбу рақамли қаршилик туфайли тўлиқ тақиқланганига қарамай, ўтган ҳафта давомида Россияда Telegram’дан фойдаланиш кўрсаткичлари барқарор бўлиб қолди”, дейди мессенжер асосчиси.

Шунингдек, у трафикни аниқлаш ва блоклашни қийинлаштириш учун мессенжер децентрализация қилинган (марказлашмаган) технологияларни ривожлантиришда давом этишини қўшимча қилган.

Эслатиб ўтамиз, Россияда ҳукуматнинг Telegram’ни блоклаш режаси кенг муҳокама қилинмоқда. “Роскомнадзор” бу маълумотларни тасдиқламаган, лекин инкор ҳам этгани йўқ. Шу билан бирга, фойдаланувчиларнинг гувоҳлик беришича, мамлакатнинг деярли барча ҳудудларида, жумладан, Москва ва Санкт-Петербург шаҳарларида ҳам мессенжер ишламаяпти ёки катта узилишлар билан ишламоқда.