Telegram қарийб 30 миллионта канални ўчириб ташлади

Жорий йилда Telegram 20,9 миллиондан ортиқ канал блоклади ва ушбу кўрсаткич мессенжер тарихида биринчи марта қайд этилди. Бу ҳақда Telegram’нинг расмий сайтида хабар берилди.

Маълумотларга кўра, жорий йилнинг 27 июль куни кунлик блокировка бўйича сўнгги рекорд кузатилиб, мессенжер администрацияси 402 мингдан ортиқ канал ва гуруҳни ўчирган. Шунингдек, жорий йилнинг 3 июль куни ҳам катта миқдорда – 314 мингдан ортиқ канал блокланган.

Аниқ сабаблар ошкор этилмаган бўлса-да, одатда бу турдаги чораларга мессенжер қоидаларини бузган каналлар ва гуруҳлар дуч келади. Бунга фирибгарлик ва бошқа рухсат этилмаган материаллар тарқатиш киради. Яқинда Telegram асосчиси Павел Дуров ҳам платформани товламачилик ва “доксинг” (кимнингдир шахсий маълумотини унинг розилигисиз тарқатиш) билан боғлиқ каналлардан тозалашни бошлаганини эълон қилган.

Маълумот учун, яқинда Telegram фойдаланувчи рейтинги тизимини жорий қилди. Дунёнинг энг оммабоп мессенжерларидан бири тез орада фойдаланувчи хатти-ҳаракатларини баҳолаш тизимига ҳам эга бўлади. Ҳар бир фойдаланувчи интерфейсда махсус белги орқали ўз аккаунти даражасини билиши мумкин бўлади. Унинг аниқ мақсади ҳозирча ошкор этилмаган, бироқ тахминларга кўра, рейтинг фойдаланувчининг тўлов қобилиятини кўрсатиши ва қўшимча функцияларни очиб бериши мумкин. Рейтингни ошириш Telegram Stars юлдузларини харид қилиш, совға қилиш ёки ишлатиш билан боғлиқ бўлиши эҳтимол қилинмоқда – ҳар 1000 юлдуз учун фойдаланувчи рейтинги ошади. Шунингдек, янги тизим мессенжерда кутилаётган чекловлар, жумладан, совғалар хариди бўйича лимитлар билан ҳам боғлиқ бўлиши мумкин.

Эслатиб ўтамиз, аввалроқ Россияда “жиноятчиларга қарши курашиш мақсадида” Telegram ва WhatsApp’да қўнғироқларга қисман чекловлар жорий этилганди. Бу икки мессенжер Россия фуқароларини алдаш, пул ундириб олиш, шунингдек, диверсия ва террорчилик фаолиятига жалб қилишда асосий овозли алоқа воситаларига айлангани қайд этилган.