Telegram'да аёлларнинг беҳаё тасвирларини тарқатиб келган “Hello Tashkent” “админ”лари қўлга олинди (видео)

“Hello Tashkent, salam Tashkent” Telegram-канали бошқарувчилари қўлга олинди. Бу ҳақда Ички ишлар вазирлиги хабар берди. 

Маълум қилинишича, вазирликнинг тезкор-қидирув департаменти Киберхавфсизлик маркази томонидан Telegram’да “Hello Tashkent, salam Tashkent” номли канал ва гуруҳларни ташкил этиб, уларга фуқароларнинг шаъни ва қадр-қимматини камситувчи видео тасвирларни жойлаштириб келган гуруҳ аниқланган. Гуруҳ ва канал бошқарувчилари жойланган тасвирларни ўчириш эвазига товламачилик йўли билан фуқаролардан пул талаб қилиб келган.

Telegram-канал ташкилотчилари асосан қизлар ва аёлларнинг фото ва видеоларини жойлаб, қизиқувчиларни VIP-чатга таклиф қилган. Унга аъзо бўлиш 100 минг сўмдан 500 минг сўмгача этиб белгиланган.

Тезкор-қидирув натижасида ушбу фаолият билан шуғулланиб келган шахслар қўлга олинган. ИИВ Тергов департаменти томонидан Жиноят кодексининг 165-моддаси 2-қисми “в” банди билан жиноят иши қўзғатилиб, гумонланувчиларга нисбатан қамоққа олиш эҳтиёт чораси кўрилган.

“Hello Tashkent, salam Tashkent” гуруҳ ва каналларидан жабрланган фуқаролар 102 қисқа рақами ёки +998991176087 рақамлари орқали хабар беришларини сўраймиз”, дейилади хабарда.