Техас Байденнинг мигрантларни қонунийлаштириш дастурини тўхтатди

Техас суди Президент Жо Байден маъмуриятининг АҚШ фуқаролари билан турмуш қурган муҳожирларга ҳуқуқий мақом бериш дастурини тўхтатишга қарор қилди. Бу ҳақда округ судьяси Кэмпбелл Баркер қарорига таяниб, “Associated Press” хабар берди.

Қарор 16 штат, шу жумладан Техас ушбу дастурга қарши даъво аризаси берганидан бир неча кун ўтгач чиқарилган. Оқибатда 500 мингга яқин ноқонуний муҳожирлар, шунингдек, уларнинг 50 мингга яқин болаларининг қонуний мақомга эга бўлиш имконияти чекланган. Техас маъмуриятининг ҳисоб-китобларига кўра, штат ҳар йили ноқонуний муҳожирлар учун ўн миллионлаб доллар сарфлаши керак. Судья штатларнинг дастурга қарши далилларини "муҳим" деб ҳисоблайди ва уларни "диққат билан кўриб чиқишни талаб қилишини" таъкидлайди.

Маълумотларга кўра, судья Баркернинг қарори икки ҳафта давомида узайтирилиши мумкин. Бу қарор узоқ вақт давомида АҚШ фуқаролигини олишни соддалаштиришга қаратилган "ҳеч бўлмаганда Президентнинг энг катта қарорларидан бирини амалга ошириш учун вақтинчалик тўсиқ" бўлади.