Теҳронда пул қадрсизланиши фонида намойишлар бўлиб ўтди (видео)

Бугун, 29 декабрь куни Эрон пойтахти Теҳронда маҳаллий валюта – эрон риали қийматининг кескин пасайиши фонида норозилик намойишлари ўтказилди. Бу ҳақда “Fars” хабар берди.

“Доллар курсининг 140 минг туман (1 миллион 400 минг риал)дан ошиб кетиши, шунингдек, тадбиркорларга босим кучайиши Теҳрон марказида икки маҳаллий норозилик акциясига сабаб бўлди”, дейилади хабарда.

Қайд этилишича, ушбу акциялар Эрондаги норозилик ҳужайралари фаолияти учун янги туртки бўлиши мумкин. “Fars” маълумотларига кўра, сўнгги икки кун ичида савдогарлар ва тадбиркорлар Теҳрондаги Чаҳорсу савдо маркази ҳамда Лолазор кўчасида тўпланган. Норозиликларнинг асосий мавзуси валюта курсининг кескин тебранишлари ва уларнинг улгуржи ҳамда чакана нархларга таъсири бўлган.

Норозиликлар билан бир вақтда Эрон халқ мужоҳидлари ташкилоти етакчиси Марям Ражавий (бу ташкилот АҚШ ва Исроил билан алоқалари билан танилган) “норозиликлар занжирини ташкил этишга” чақирган. “Fars”нинг ёзишича, ушбу шиорлар ва Эрондаги ижтимоий вазиятни беқарорлаштиришдан кўзланган мақсад сиёсий беқарорликка эришишдан иборат. 

Эслатиб ўтамиз, жорий йилнинг ноябрь ойида Эрон Президенти Масъуд Пезешкиён миллий валютани деноминациялаш ҳақида фармон чиқарганди.