ТДАУ тест синовига футболкада келган абитуриент бинога киритилмади

Жамият

image

Жорий йилнинг Тошкент давлат аграр университетига ўқишга ҳужжат топширган абитуриентлардан бири – Бекзод Абдулазизов 1 август куни бўлиб ўтган тест синовларида иштирок этиш учун ичкарига киритилмаган. Бунга эса унинг тест синовларида оқ кўйлакда келмагани рўкач қилинган. Хўш, бунга ДТМ ва ОТМларда тестларни ташкил этувчи масъулларнинг ҳаққи борми? Ўрнатилган тартибда ҳужжат топшириб, камига тестда қатнашиш учун белгиланган пулни тўлаган абитуриентга бундай муносабат кўрсатилиши тўғрими? Ҳали талаба мақомини олмаган йигит-қизлардан форма талаб қилиш кераклиги қайси қонун ё қонуности ҳужжатларда ёзилган. Ушбу савол билан QALAMPIR.UZ мухбири Феруза Нажмиддинова Давлат тест маркази Тест синовларини ташкил этиш ва назорат қилиш бошқармаси бошлиғи Диёрбек Қўчқоровга мурожаат қилди. 

“Бундай мурожаат бизга етиб келгани йўқ. Давлат тест маркази томонидан абитуриентларнинг кийимига талаб қўйилмаган. Ҳар бир абитуриент ўзи хоҳлаганича ҳолатда келиши мумкин. Абитуриент шахсини тасдиқловчи ҳужжат – паспорт билан ўз вақтида тест синовларига келса, унда иштирок этиши таъминланади. Оқ кўйлакмас, футболкада келган бўлса уни киритилмасин деган тартиб жорий қилинмаган”.

Бошқарма бошлиғи сўзида давом этаркан, ДТМ 1992 йилдан буён мамлакатда олий ўқув юртларига кириш тест синовларига бош-қош бўлиб келаётгани, аммо форма юзасидан ҳеч қандай талаб жорий этмаганини қўшимча қилди. 

“ДТМ 92-йилдан буён тест синовлари ўтказилади. Ҳеч қачон сен футболкада кел, сен оқ кўйлакда кел деган топшириқ бермаган”. 

ДТМ Тест синовларини ташкил этиш ва назорат қилиш бошқармаси бошлиғи Диёрбек Қўчқоров Тошкент давлат аграр университетидаги тест синовларига футболкада боргани учун киритилмаган абитуриентнинг исм-шарифини ёзиб олди ва вазиятни ўрганиб чиқишини ваъда қилди. Ўшандан буён орадан уч кун вақт ўтди, бироқ ҳали айтарли жавоб берилгани йўқ. 


Мақола муаллифи

Теглар

ДТМ

Баҳолаганлар

112

Рейтинг

2.9

Мақолага баҳо беринг

Дўстларингиз билан улашинг