Тарбиячиси болага латта “едирган” боғчанинг фаолияти тўхтатилди

Аввалроқ, Тошкент шаҳридаги боғчаларнинг бирида тарбиячи боланинг оғзига латта тиқиб, қийнагани ва кейинроқ мазкур ҳолат бўйича жиноят иши қўзғатилгани ҳақида хабар берилган эди. Ушбу ҳодиса ортидан “Rayyan Kids Land” боғчасининг фаолияти тўхтатилди. Бу ҳақда Тошкент шаҳар судлари хабар берди.

Қайд этилишича, бугун, 14 июль куни Тошкент туманлараро иқтисодий судида Ўзбекистон Республикаси Мактабгача ва мактаб таълими вазирлигининг жавобгар “Rayyan Kids Land” оилавий корхонасига нисбатан лицензияни бекор қилишга оид ҳуқуқий таъсир чорасини қўллаш тўғрисидаги аризаси кўриб чиқилган.

Муҳокама якунида суднинг ҳал қилув қарори билан қайд этилган оилавий корхонага (нодавлат таълим хизматларини кўрсатиш фаолиятини амалга ошириш учун) 2025 йил 13 августда берилган лицензия бекор қилинган.

Шуниингдек, раислик қилувчи томонидан суд ҳужжати мазмуни ҳамда унга нисбатан шикоят қилиш тартиби ва муддатлари тушунтирилган.

Эслатиб ўтамиз, жорий йилнинг 24 июнь куни ушбу таълим ташкилоти тарбиячиси А.Г. томонидан тарбияланувчилардан бирига нисбатан жисмоний ва рухий зўравонлик қилингани қайд этилган. Шунингдек, ўрганиш натижаларига кўра, таълим ташкилоти томонидан қонунчилик ҳужжатларида белгиланган 6 та ҳолат бўйича лицензия талаблари ва шартлари қўпол равишда бузилгани аниқланган.