Таниқли математик Азимбой Саъдуллаев вафот этди

Ўзбекистон Фанлар академияси академиги, Ўзбекистон Миллий университети Математик анализ кафедраси профессори, физика-математика фанлари доктори, таниқли математик олим Азимбой Саъдуллаев бугун, 28 май куни 78 ёшида вафот этди. Бу ҳақда Ўзбекистон Фанлар академияси хабар берди.

Қайд этиш жоиз, Азимбой Саъдуллаев томонидан яратилган илмий мактаб, етиштирилган шогирдлар ва олиб борилган фундаментал тадқиқотлар нафақат Ўзбекистонда, балки халқаро миқёсда ҳам эътироф этилган. Олимнинг “Кўп комплексли ўзгарувчи функциялар назарияси” ва “Комплекс потенциаллар назарияси” соҳасидаги илмий ишлари дунё математикларининг ҳурматини қозонган.

Азимбой Саъдуллаев Ўзбекистон Республикаси Фахрий ёрлиғи, “Ўзбекистон белгиси” кўкрак нишони, “Меҳнат шуҳрати” ордени билан мукофотланган.

Эслатиб ўтамиз, олдинроқ Ўзбекистон Республикаси Фанлар академияси Санъатшунослик институтининг тасвирий ва амалий санъат бўлими мудири, йирик давлат ва жамоат арбоби Зафар Абдуллаевич Ҳакимов вафот этганди.