ШКТР президенти Ўзбекистонда учрашувлар ўтказди. У ИҲТга қўшилгани айтилмоқда

Аввалроқ тан олинмаган Шимолий Кипр Турк Республикаси президенти Эрсин Татар Ўзбекистонга келгани ҳақида хабар берган эдик. Ташрифи расмий манбалар томонидан очиқланмаган Эрсин Татар Тошкентда Туркия Республикаси Президенти Ражаб Тойиб Эрдўған, Покистон Ислом Республикаси Бош вазири Анвар ул-Ҳақ Какар ва Иқтисодий ҳамкорлик ташкилоти (ИҲТ) Бош котиби Хусрав Нозирий билан учрашди. 

Эътиборли жиҳати шундаки, тан олинмаган Шимолий Кипр Турк Республикаси президенти идораси томонидан Эрсин Татарнинг Туркия Республикаси Президенти Ражаб Тойиб Эрдўған билан учрашгани ҳақида тарқатилган хабарда Шимолий Кипр Турк Республикаси Иқтисодий ҳамкорлик ташкилотининг Тошкентда ўтаётган 16-саммитида кузатувчи мақомида иштирок этаётгани айтилган. 

Шунингдек, Татар Покистон Ислом Республикаси Бош вазири Анвар ул-Ҳақ Какар билан икки давлат ўртасидаги алоқаларни муҳокама қилган. 

Татар, Покистон Бош вазирига Кипр муаммосининг тарихи ва музокара жараёнлари ҳақида маълумот бериб, Кипр турк халқига нисбатан қўйилган адолатсиз эмбарголарни изоҳлаган. Шимолий Кипр Турк Республикасида қардош Покистоннинг 10 мингга яқин фуқароси яшаётганини эслатган ва Покистон билан яқин ҳамкорликни ривожлантириш истакларини ифода этган.

Кипрда муаммонинг ечими фақат икки давлат тамойили асосида амалга оширилиши мумкинлигини ифода этган Татар, буни Бирлашган Миллатлар Ташкилоти ва алоқага чиққан барча расмийларга тушунтирганини қайд этган. 

У  Кипр турк халқининг оролда тенг ҳуқуқли халқ эканлигини, лекин Европа Иттифоқининг Кипр румларини якка аъзо сифатида ҳақсиз қабул қилганини ва икки давлатнинг ҳамкорлигига асосланган ечимнинг энг яхши ечим бўлишини айтган. 

Ғазода содир бўлган воқеаларнинг Кипр турк халқи бошидан кечирган ҳужум ва қирғинларга ўхшаш эканини тилга олган Татар, бу ҳужумлар ўтмишни эслатганини, болалар ўлдирилган ҳужумларнинг ниҳоясига етишидан умидворлигини билдирган. 

Покистон Бош вазири Какар эса Шимолий Кипр Турк Республикасининг ИҲТда иштирокини қўллаб-қувватлашини билдирган. 

Шунингдек, Татар, ИҲТ Бош котиби Хусрав Нозирий билан учрашувда ШКТР ИҲТ билан алоқаларини ривожлантиришни хоҳлаётганини маълум қилган. 

Ўз навбатида, ИҲТ Бош котиби Хусрав Нозирий Эрсин Татарга юзланиб, Кипр турк халқининг муаммо ва талабларини яқиндан билишини ва халқаро алоқаларини ривожлантиришни қўллаб-қувватлашини очиқлаган.  

Нозирий, шунингдек, Шимолий Кипр Турк Республикасининг ИҲТ йиғилишларида кузатувчи мақоми билан иштирок этишидан мамнунлигини билдирган.

Эслатиб ўтамиз, Туркиядан ўзга ҳеч бир мамлакат томонидан тан олинмаган Шимолий Кипр Турк Республикаси президенти Эрсин Татар Иқтисодий ҳамкорлик ташкилотининг 16-саммитида иштирок этиш учун кеча, 8 ноябрь куни Тошкентга келди. Унинг ташрифи ҳақида Ўзбекистондаги расмий манбаларда ахборот берилмади. Шунингдек, Президент Администрацияси томонидан ИҲТ саммити ҳақида тарқатилган расмий ахборотда Шимолий Кипр Турк Республикасидан вакил иштирок этиши ҳақида сўз бормаган. 

Шуни алоҳида қайд этиш ўринлики, жорий йилнинг 2-3 ноябрь кунлари Қозоғистон пойтахти Остона шаҳрида ўтказилган Туркий Давлатлар Ташкилотининг Х саммитида иштирок этган Туркия Республикаси Президенти Ражаб Тойиб Эрдўған ўз анъанасига содиқ қолиб, саммитдаги нутқида, Шимолий Кипр Турк Республикасини дастаклаб, унинг Иқтисодий ҳамкорлик ташкилотига ҳам кузатувчи бўлиб қўшилишини ТДТнинг бошқа лидерлари қўллаб-қувватлашини сўраган эди. 

Туркий Давлатлар Ташкилотининг Х саммити якунлари бўйича давлат раҳбарлари томонидан имзоланган декларацияда туркий дунёнинг ажралмас қисми бўлган Шимолий Кипр Турк Республикасининг Туркий давлатлар парламент ассамблеяси ва Туркий савдо-саноат палаталари иттифоқида кузатувчи мақоми ҳамда Иқтисодий ҳамкорлик ташкилотида кузатувчи мақомига эга бўлиши қайд этилган.

Бир-бирини рад этувчи баёнотлар

ТДТнинг 2022 йил ноябрь ойида бўлиб ўтган Самарқанд саммитида Туркия Президенти Ражаб Тойиб Эрдўған дунё мамлакатларини ҳайратда қолдирган баёнот билан чиқди. У ўз нутқида Туркиядан ташқари дунёнинг ҳеч бир мамлакати тан олмаган Шимолий Кипр Турк Республикаси Туркий Давлатлар Ташкилотига кузатувчи бўлиб қўшилганини айтди ва бунинг учун ташкилот давлатлари раҳбарларига миннатдорлик билдирди. 

“Биродарлик қонуни талабларини бажарган ҳолда, Шимолий Кипр Турк Республикасини [Туркий давлатлар] ташкилотимизга кузатувчи давлат ўлароқ қабул қилдик. Турк дунёсининг ажралмас бир қисми бўлган кипрлик биродарларимизнинг ёлғиз эмаслигини кўрсатиб, ечим жараёнига ҳам ҳисса қўшдик. Ушбу бирдамлик иродасини намоён этганингиз учун сиз, азиз биродарларимнинг ҳар бирингизга алоҳида миннатдорлик билдираман”, дейди Эрдўған.

Орадан кўп ўтмай, Туркия Республикаси Ташқи ишлар вазири Мавлуд Чавушўғли Эрдўғаннинг айтганларига таяниб, Шимолий Кипр Турк Республикасининг Туркий давлатлар ташкилотига кузатувчи давлат сифатида қўшилгани ҳақидаги хабарни Twitter’даги саҳифаси орқали бўлишди. Вазир, Анқаранинг Шимолий Кипр Турк Республикасини қўллаб-қувватлашни давом эттиришда қатъийлигини таъкидлаган.

Туркия расмийлари томонидан берилган икки баёнотдан сўнг, Ўзбекистон Республикаси Ташқи ишлар вазири Владимир Норов Шимолий Кипр Турк Республикасининг ташкилотга кузатувчи сифатида қўшилганини рад этиб чиқди. 

“Саммит натижасида Шимолий Кипр бўйича алоҳида қарор имзоланмади. Ўзбекистон, айниқса, давлат суверенитети, мустақиллиги ва ҳудудий яхлитлиги масалаларида халқаро ҳуқуқ нормаларига қатъий амал қилади.

Шимолий Кипрни мустақил давлат сифатида тан олиш ҳақида гап бўлиши мумкин эмас”, дейди Норов.

Бироқ, оммавий ахборот воситалари Владимир Норовнинг баёнотидан қониқиш ҳосил қилгани йўқ. Айниқса, хорижий медиа аллақачон Туркий Давлатлар Ташкилоти Шимолий Кипр Турк Республикасини Бирлашган Миллатлар Ташкилоти резолюцияларига зид равишда тан олишда айбламоқда. 

Греция эса Шимолий Кипр ҳақидаги баёнотларни аллақачон қоралашга тушди. 

Греция Туркия расмийларининг халқаро ҳамжамият томонидан тан олинмаган Шимолий Кипр Турк Республикасига Туркий Давлатлар Ташкилотида кузатувчи мақоми берилиши ҳақидаги баёнотларини қоралайди. Бу ҳақда Греция Ташқи ишлар вазирлиги 11 ноябрь куни тарқатган баёнотида айтилади. 

"Биз турк расмийларининг сохта давлатнинг Туркий Давлатлар Ташкилотига кузатувчи мақомига эга бўлганлиги ҳақидаги баёнотларини қоралаймиз. Кипр Республикаси Ташқи ишлар вазирлиги ҳам бу борада тегишли хабар тарқатди. Ҳар қандай псевдодавлат мақомини оширишга уриниш халқаро ҳуқуқ ва Бирлашган Миллатлар Ташкилоти Хавфсизлик Кенгашининг 541 ва 550-сонли резолюцияларини қўпол равишда бузиш ҳисобланади”, дейилади ҳужжатда. 

Ташқи ишлар вазирлиги маълумотларига кўра, Грециянинг позицияси барқарор ва ўзгармасдир.  

“Биз Кипр муаммосининг БМТ Хавфсизлик Кенгашининг тегишли резолюцияларига асосланадиган ва Европа қонунчилигига мос келадиган адолатли ва барқарор ечимга эришиш, яъни икки жамоали, икки ҳудудли федерация ташкил этилишини қўллаб-қувватлаймиз”, дея таъкидлади вазирлик.

Барча тортишувларга қарамай, бугунги кунда Туркий Давлатлар Ташкилотининг Истанбулдаги қароргоҳида ташкилотга аъзо ва кузатувчи давлатлар байроқлари қаторида Шимолий Кипр Турк Республикасининг байроғи ҳам ҳилпираб турибди. Тан олинмаган ушбу республиканинг раҳбари Эрсин Татар эса жорий йилнинг март ойида Анқарада бўлиб ўтган ТДТ давлатлари раҳбарлари саммитида иштирок этди. 

Гап шундаки, Кипр оролнинг Грецияга қўшилиши тарафдорлари томонидан амалга оширилган давлат тўнтариши натижасида 1974 йилда Туркия қуролли босқинидан бери этник жиҳатдан иккига бўлинган. Ҳарбий ҳаракатлар натижасида Кипр ҳудудининг тахминан 37 фоизи Туркия назорати остида бўлиб, Шимолий Кипр – 1983 йилда ташкил топган ва жаҳон ҳамжамиятида фақат Анқара томонидан тан олинган. Туркия Шимолий Кипрда 40 минг кишилик ҳарбий контингентини сақлаб турибди. Оролнинг жанубий қисми асосан Кипр юнонлари яшайдиган Кипр Республикаси назорати остида қолди.

Шимолий Кипр Турк Республикаси Туркиянинг иқтисодий, сиёсий ва ҳарбий ёрдамига жуда боғлиқ. Кипр Республикаси ва БМТ уни босқинчи куч деб ҳисоблайди. Шимолий Кипр Ислом Ҳамкорлик Ташкилотига кузатувчи сифатида аъзо. 

Шимолий Кипр Турк Республикаси аҳолиси тахминан 294 906 киши бўлиб, 3355 км² майдонда яшайди. Аҳолининг катта қисмини этник турклар ташкил этади. Уларнинг анклавларида кипр юнонлари ва ливанлик маронитлар ҳам яшайди. Шимолий Кипр Республикаси пойтахти – Кипр Республикаси ва Шимолий Кипр Республикаси ўртасида бўлинган Лефкоса (Никосия) шаҳри. 

Шимолий Кипр Турк Республикаси Кипрнинг қолган қисмидан буфер зона билан ажратилган. Оролни икки секторга ажратувчи чизиқ Кипрдаги БМТ тинчликпарвар кучлари контингенти томонидан қўриқланади.