Таиландда полиция мушукни ҳибсга олди

Таиланд полицияси мушукни ҳуқуқ-тартибот идоралари ходимларига ҳужум қилгани учун ҳибсга олиб, унинг панжа изларини олди. Бу ҳақда “South China Morning Post” хабар берди.

Маълум қилинишича, йўқолиб қолган мушук ўз эгасини топиш учун ёрдам бермоқчи бўлган полициячиларга ҳужум қилиб, уларни тишлаган. Ҳолат ҳазиломуз бўлсада, полиция ҳодиса тафсилотларини расмий тартибда қайд этиб, мушукнинг панжа изларини олган ва унинг ҳибсга олиш пайтидаги суратини ҳам тайёрлаган.

“Умид қиламизки, бу ҳуқуқбузар сабоқ олди”, деган полиция ходимларидан бири.

Бир неча кундан сўнг мушукнинг эгалари келиб, уни олиб кетишганидан сўнг, мушукка қўйилган барча айбловлар олиб ташланган.

Эслатиб ўтамиз, аввалроқ Коста-Рика қамоқхонасида гиёҳванд моддаларни ташишда восита сифатида ишлатилган мушук қўлга олинганди. Ҳайвоннинг танасига 235,65 грамм марихуана ва 67,76 грамм героин солинган пакетлар боғланган.