Таиланд ва Камбоджа АҚШ воситачилигига қарамай жанг қилмоқда

АҚШ Президенти Дональд Трамп Таиланд ва Камбоджа ўртасида ўт очишни тўхтатиш бўйича келишувга эришилганини айтганига қарамай, бугун, 13 декабрда томонлар ўртасида жанглар давом этди. Камбоджа Ахборот вазирлиги Таиланднинг ҳарбий самолётлари баҳсли чегара орқали ҳужумлар уюштирганини маълум қилди. Ўз навбатида, Таиланд армияси Камбоджани халқаро ҳуқуқни бузишда айблади.

Бир кун аввал Дональд Трамп Таиланд ва Камбоджа Бош вазирлари Анутин Чанвиракун ва Хун Манет билан телефон орқали музокаралар ўтказиб, 12 декабрдан бошлаб барча жанг ҳаракатларини тўхтатиш бўйича келишувга эришилганини билдирган эди.

Бироқ суҳбат якунлари бўйича қилган баёнотларида на Анутин, на Хун бундай келишувни тилга олди. Таиланд Бош вазири сулҳга эришилганини очиқ рад этди. 

“Таиланд мамлакатимиз ва аҳолимиз учун хавф-хатар йўқолганини ҳис қилмагунча ҳарбий ҳаракатларни давом эттиради”, деб ёзди у Facebook саҳифасида.

Камбоджа ҳукумат раҳбари эса Facebook’даги постида Трамп билан бўлган суҳбатни тилга олди, бироқ мамлакати ҳали ҳам октябрь ойида Куала-Лумпурда имзоланган келишув асосида тинч ечим излаётганини маълум қилди.

Чегара масаласи билан боғлиқ бўлган ва ўн йиллаб давом этиб келаётган Камбоджа–Таиланд қарама-қаршилигининг навбатдаги кескинлашуви 8 декабрда бошланди. Томонлар чегаранинг турли ҳудудларида ракета ва артиллерия қўллаб жангларни қайта бошлади. Расмий маълумотларга кўра, тўқнашувлар оқибатида ҳар икки томондан камида 20 киши, жумладан, таиландлик аскарлар ва камбоджалик тинч аҳоли вакиллари ҳалок бўлган.

Июль ойидаги олдинги кескинлашувдан сўнг — ўшанда беш кунлик жанглар давомида 40 дан ортиқ киши ҳалок бўлган ва тахминан 300 минг тинч аҳоли уй-жойини тарк этишга мажбур бўлган — АҚШ воситачилигида сулҳга эришилган эди. Октябрь ойи охирида Камбоджа ва Таиланд Бош вазирлари “кескинликни пасайтириш, ишончни тиклаш ва ўзаро манфаатли муносабатларни ривожлантиришга кўмаклашиш” мажбуриятини ўз ичига олган декларацияни имзолаган.

Бироқ ноябрь ойида Таиланд ушбу келишувни бажаришдан чекинди. Бангкок маълумотига кўра, чегара ҳудудида минанинг портлаши натижасида икки нафар таиландлик аскар ҳалок бўлган. Шу асосда Таиланд Камбоджани сулҳ режими бузилганликда айблади.