Тагликка олтин яширганлар ушланди

Ўзбекистондан қуйма олтин бўлакларини чақалоқ таглиги ичига яширган ҳолда олиб чиқишга бўлган уриниш фош этилди. Бу ҳақда Тошкент вилояти божхона бошқармаси хабар берди.

Қайд этилишича, “Яллама” чегара божхона пости ходимлари томонидан Ўзбекистондан чиқиб кетаётган фуқаро белгиланган тартибда божхона назоратидан ўтказилган. Унинг қўл сумкаси кўздан кечирилганда, ичида умумий оғирлиги 111 грамм бўлган 2 дона олтин қуймаси чақалоқлар таглигига яширилгани аниқланган. Дастлабки ҳисоб китобларга кўра, ушбу буюмларнинг умумий қиймати 133 млн сўмни ташкил қилган.

Билдирилишича, ҳозирда ҳолат юзасидан божхона органлари томонидан суриштирув ҳаракатлари олиб борилмоқда.

Маълумот учун, амалдаги қонунчиликка мувофиқ, жисмоний шахсларга оғирлиги 200 граммгача бўлган кумушдан ҳамда 65 граммгача бўлган олтин ясалган тайёр заргарлик буюмларини йўловчи божхона декларациясини тўлдирмасдан, ушбу миқдорлардан ортиқ бўлганларини йўловчи божхона декларацияси асосида Ўзбекистон Республикаси ҳудудидан ташқарига олиб чиқишга рухсат берилади.

Эслатиб ўтамиз, аввалроқ Сурхондарё вилоятининг Термиз аэропорти чегара божхона постида йўловчилардан бири 5 дона қадимий тангаларни яширинча олиб чиқишга уринган вақтида тўхтатиб қолинганди.