Сурхондарёда 4 та археология ёдгорлигига 7 млрд сўмлик зарар етказилди

Сурхондарё вилоятининг Шеробод туманида 4 та археология ёдгорлигига 7 млрд сўмлик зарар етказилгани аниқланди. Бу ҳақда Бош прокуратура матбуот хизмати маълум қилди. 

Қайд этилишича, прокуратура органлари томонидан Маданий мерос агентлиги билан ҳамкорликда тарихий ёдгорликларни муҳофаза қилишга қаратилган тизимли назорат тадбирлари ўтказиб келинмоқда.

Мазкур тадбирларда Сурхондарё вилоятининг Шеробод туманида 4 та археология ёдгорлигига 7 млрд сўмлик зарар етказилгани аниқланган.

Хусусан: 

• мил. авв. V–I асрларга оид “Таллаган тепа” ёдгорлигининг 40 м2 қисми кесиб олиниб, автомобиль йўли ўтказилиши оқибатида 888 млн сўмлик;
• V–VIII асрларга оид “Ғўринтепа” ёдгорлигининг 200 м2 қисми бузилиб, уй-жойлар қуриб юборилиши оқибатида 4,7 млрд сўмлик; 
• I–IV асрларга оид “Хушвақтепа” ёдгорлигининг 12 м2 қисми кесиб олиниб, ҳожатхона қурилганлиги оқибатида 266 млн сўмлик;
• V–VII асрларга оид “Тоштепа” ёдгорлигининг 56 м2 тупроқлари кесиб олиниб, молхона қурилганлиги оқибатида 1,2 млрд сўмлик зарар етказилган.

Бош прокуратура матбуот котиби Ҳаёт Шамсутдиновга кўра, ушбу ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.