Суриянинг янги раҳбари энди Туркияга боради

Суриянинг ўтиш даври президенти Аҳмад аш-Шара (Абу Муҳаммад ал-Жўлоний) эртага, 4 февраль куни Туркияга боради. Бу ҳақда Туркия Президенти маъмуриятининг алоқа бўлими раҳбари Фаҳреттин Альтун X ижтимоий тармоғида ёзиб қолдирди.

Унинг сўзларига кўра, Аҳмад ал-Шарани Туркия Президенти Ражаб Тойиб Эрдўған шахсан таклиф қилган. 

“Сурия ўтиш даври президенти Аҳмад аш-Шара 4 февраль куни Президентимиз Ражаб Тойиб Эрдўғаннинг таклифига биноан Анқарага ташриф буюради”, дея ёзган у. 

Шунингдек, у музокаралар чоғида Суриядаги сўнгги ўзгаришлар, иқтисодиёт ва бошқа кўплаб соҳалар муҳокама қилинишини ҳам ёзиб қолдирган. 

“Музокаралар чоғида Суриядаги сўнгги ўзгаришлар ҳар томонлама муҳокама қилинади ва баҳо берилади. Иқтисодиётни тиклаш, Сурияда барқарорлик ва хавфсизликни таъминлаш учун икки давлат қўшма қадамлар қўйилиши керак”, деган Альтун. 

Унинг қўшимча қилишича, Туркия Суриядаги ўтиш даври ҳукуматларига кўп тарафли платформаларда кўрсатиши мумкин бўлган ёрдам масаласи ҳам муҳокама қилинади.

Эслатиб ўтамиз, аввалроқ “Dailiy Sabah” нашри Ал-Жўлоний номи билан танилган Суриянинг янги етакчиси Аҳмад аш-Шаранинг илк ташрифи қўшни Туркияга бўлиши ҳақида хабар берганди. Аммо кеча, 2 февраль куни Суриянинг ўтиш даври президенти Аҳмад аш-Шара Саудия Арабистонига илк хорижий ташрифини амалга оширганди. Шунингдек, у мазкур ташриф доирасида Ар-Риёдда Саудия Арабистони валиаҳд шаҳзодаси ва Бош вазири Муҳаммад бин Салмон Ол Сауд билан учрашди.