Суриядаги террор ташкилот аъзоси бўлган наманганлик йигитга суд ҳукми ўқилди

Суриядаги террор ташкилот аъзоси бўлган наманганлик 36 ёшли эркак 9 йилга озодликдан маҳрум қилинди. Бу ҳақда ЎзА хабар берди. 

Қайд этилишича, кеча, 21 сентябрь куни жиноят ишлари бўйича Юнусобод тумани судида Жиноят кодексининг 155-2-моддаси (Террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш) 1- ва 2-қисмлари, 244-1-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” банди ва 244-2-моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 1-қисми билан айбланаётган фуқарога оид жиноят иши кўриб чиқилган. 

Суд материалларига кўра, 1987 йилда Наманган вилоятида туғилган фуқаро 2016 йил 6 сентябрь куни яқин дўстининг таклифи билан Туркиянинг Истанбул шаҳрига борган. Бир йилдан сўнг Истанбулдан Сурияга ўтиб, “Хайъат Тахрир Шом” халқаро террористик ташкилотига қўшилган. У ерда 2017 йилнинг декабрь ойига қадар террорчиларни тайёрлаш лагерида жангавор тайёргарлик ўтаган.

2018 йил сентябрь ойида эса террористик ташкилот сафини кенгайтириш учун Туркияга қайтган ва 2022 йил декабрь ойига қадар бир гуруҳ шахсларни ёллаб, уларни Сурияга жўнатишни ташкиллаштирган.

Судланувчига нисбатан Жиноят кодексининг юқорида келтирилган моддалари билан узил-кесил 9 йилга озодликдан маҳрум қилиш жазоси тайинланланган.

Эслатиб ўтамиз, аввалроқ Суриядаги “Катибатул Имом ал-Бухорий” халқаро террорчилик ташкилотининг ўзбекистонлик етакчиси жанговар ҳаракатлар вақтида ўлдирилгани ҳақида хабар берилган эди. Шунингдек, халқаро террорчилик ташкилоти сафига бориб қўшилган ўзбекистонлик 23 ёшли йигитга нисбатан қидирув эълон қилинганди.