“Султон суягини хорламас”. Алиева янги лавозимга ўтирди

Озарбайжон биринчи хоними ва вице-президенти Меҳрибон Алиева кейинги беш йилга Озарбайжон Гимнастика федерацияси президенти (Ижроия қўмитаси раиси) этиб сайланди. Бу ҳақда федерацияси ахборот хизмати хабар берди.

Гимнастика федерациясининг ҳисобот-сайлов характеридаги 16-умумий йиғилишининг расмий очилишдан сўнг федерация вице-президенти Алтай Ҳасанов 2021-2025 йиллар давомида амалга оширилган ишлар, ўтказилган мусобақалар ва эришилган натижалар ҳақида видео ҳисобот тақдим этган.

Унинг таъкидлашича, сўнгги беш йилда Озарбайжон гимнастикаси жадал ривожланган ва спортчилар халқаро майдонларда мамлакатни муносиб ҳимоя қилган.

Гимнастика федерациясининг молия директори Виктория Абушова эса 2021-2025 йиллар бўйича молиявий ҳисоботни тақдим этган. Умумий йиғилишда федерация низомига ўзгартиришлар киритилиб, янги таҳрирда тасдиқланган. Назорат-тафтиш ва Интизом комиссиялари таркибида ўзгаришлар қилинган, шунингдек Атлетлар ва Апелляция комиссияларини шакллантириш низомда ўз аксини топган.

Шундан сўнг Ижроия қўмитасига сайлов ўтказилган. Овоз бериш натижаларига кўра, Меҳрибон Алиева навбатдаги беш йил муддатга Гимнастика федерацияси президенти этиб сайланган.

Алтай Ҳасанов вице-президент, Рауф Алиев, Рафиқ Бейбутов ва Вафо Бакарова эса Ижроия қўмитаси аъзолари этиб тасдиқланган. Йиғилишда “Интизом қоидалари”, “Этика қоидалари” ҳамда “Гимнастикада хавфсиз муҳитни таъминлаш ва иштирокчиларнинг шахсини ҳимоя қилиш қоидалари” муҳокама қилинган. Шунингдек, тегишли комиссиялар аъзолари сайланган.
 
Якунда 2025 йилда нуфузли мусобақаларда юқори натижаларга эришган спортчилар эсдалик медаллари билан тақдирланган.

Эслатиб ўтамиз, аввалроқ Германиянинг Мюнхен шаҳрида бошланган 2026 йилги хавфсизлик конференциясига борган Меҳрибон Алиева журналистнинг демократия ҳақидаги саволини эътиборсиз қолдириб, Озарбайжонда демократия қай даражада эканини айтишдан қочган эди.