Сулҳ давом этади. ҲАМАС Исроилга жасадларни топширди

ҲАМАС ҳаракати томонидан уч нафар ҳалок бўлган гаровдагиларнинг жасади солинган тобутлар Қизил Хоч орқали Исроил мудофаа кучлари ва Бош хавфсизлик хизматига топширилди. Бу ҳақда кеча, 2 ноябрь куни Исроил Бош вазири Биньямин Нетаньяхунинг идораси хабар берди. 

“Исроил Қизил Хоч орқали Исроил мудофаа кучларига топширилган учта ҳалок бўлган гаровдагининг тобутларини қабул қилди”, дейилади хабарда. 

Кейинчалик, Исроил Соғлиқни сақлаш вазирлиги вакили жасадларнинг ўлим ҳолати ва сабабларини аниқлаш, текшириш учун Миллий суд-тиббий экспертиза марказига олиб кетилганини эълон қилди. 

ҲАМАСнинг қуролли қаноти кеча, 2 ноябрь куни Ғазо секторининг жанубидаги туннель яқинида қолдиқларни топганини даъво қилди. Булар уч аскарнинг жасади эканлиги тахмин қилинмоқда. Ҳозиргача гаровга олинган 28 та жасаддан ўн еттитаси қайтарилди, жумладан, 15 нафар исроиллик, битта таиландлик ва битта непаллик фуқаронинг жасадлари ҳам. 

2023 йил 7 октябрда ҲАМАСнинг Исроилга қилган ҳужуми Яқин Шарқ можаросининг авж олишининг бошланғич нуқтаси бўлди. Ҳаракат вакиллари Исроилга ракета ҳужуми уюштирди, унинг ҳудудига бостириб кирди ва замонавий Исроил давлати тарихидаги энг йирик тинч аҳолини қирғин қилди, тахминан 1200 киши ўлдирилди. Шунингдек, улар тахминан 250 кишини гаровга олиб, Ғазо секторига олиб кетди. Кейинчалик гаровга олинганлар алмашилди ва баъзилари ҳалок бўлди.

Бунга жавобан Исроил ҲАМАСга қарши уруш эълон қилди. Ғазо секторини операцияси ва бомбардимон қилиш пайтида 68 мингдан ортиқ фаластинликлар ҳалок бўлган ва 170 мингдан ортиқ одам яраланган.

Эслатиб ўтамиз, аввалроқ Исроил армияси Ғазо секторида ҲАМАС инфратузилмасига зарбалар берган эди. Оқибатда 100 га яқин инсон ҳалок бўлгани айтилмоқда. Исроил маълумотларига кўра, бу – Рафаҳ шаҳри яқинида ҲАМАС исроиллик аскарларга қарши танк ракетасини учирганидан кейин содир бўлган. ҲАМАС эса бу ҳодисага алоқадорлигини рад этмоқда.