Сукунат бузилди: АҚШ ва Эрон кемалари ҳужумга учради (видео)

АҚШ ва Эрон жавоб зарбаларини алмашди. Бу бир ойлик нисбий сукунатдан сўнг бир ҳафта олдин ҳарбий ҳаракатлар қайта бошланганидан бери амалга оширилган навбатдаги ҳужумлар раунди бўлди.

АҚШ Марказий қўмондонлиги (CENTCOM) Х ижтимоий тармоғида Ислом инқилоби қўриқчилари корпуси (ИИҚК) АҚШ ҳарбийларининг иккита ҳарбий кемасига баллистик ракеталарни учирганидан сўнг Эроннинг учта нефть танкерига зарба берилганини маълум қилди.

“Американинг авиаташувчи кемаси ва бошқариладиган ракеталарга эга эсминеци Эрон томонидан амалга оширилган кўплаб сабабсиз ҳужумлардан муваффақиятли омон қолган. Америка томонидан ҳеч ким жабрланмаган.

Эроннинг муваффақиятсиз ҳужумларидан сўнг CENTCOM Харг ороли қирғоқлари яқинидаги ИИҚКнинг M/T Downy танкерини ва Жаск яқинидаги M/T Stark 1 танкерини бутунлай ишдан чиқарган. Америка кучлари, шунингдек, Уммон кўрфазида юксиз бўлган M/T Kylo (шунингдек “Ноксен” номи билан маълум) танкерини экипажга кемани тарк этиш буюрилганидан сўнг бир нечта ўта муҳим жойларига зарба бериб, фойдаланишга яроқсиз ҳолга келтирди ва уни бутунлай йўқ қилди”, дейилади хабарда.

CENTCOM маълумотларига кўра, ҳужумга учраган Эрон нефть танкерлари ИИҚК ва унинг минтақавий вакилларини (прокси-кучларини) молиялаштирадиган кўп миллиард долларлик хуфиёна тармоқнинг бир қисми ҳисобланади. Эронда уларни ҳимоя қилиш учун воситалар мавжуд эмаслиги таъкидланмоқда.

“Ислом инқилоби қўриқчилари корпусига йўлланган мурожаат аниқ бўлсин: агар сиз бизнинг иккита кемамизга ўт очсангиз, биз сизнинг учта кемангизни йўқ қилиб, янада каттароқ иқтисодий зарар етказамиз. Биз Америка кучларини ҳимоя қилишдан иккиланмаймиз ва зарур бўлса, Эроннинг чекланган ҳамда ожиз нефть флотини йўқ қиламиз”, дейди АҚШ Марказий қўмондонлиги қўмондони Брэд Купер.

BBC хабар қилишича, Эрон давлат ОАВлари зарбаларни тасдиқлаган ва Теҳрон бунга жавобан АҚШ билан боғлиқ учта кемага, шунингдек, Ҳормуз бўғози орқали “рухсат берилмаган” йўналишда ҳаракатланаётган учта нефть танкерига ҳужум қилганини маълум қилган.

Бундан ташқари, АҚШ ҳужумларидан сўнг “Хатам ал-Анбиё” ҳарбий қўмондонлиги марказий штабининг расмий вакили Иброҳим Золфагари баёнот билан чиққан.

“Биз АҚШ армиясини огоҳлантирамиз: агар у ўз ёвузликларини ва Эрон кемаларини таъқиб қилишни давом эттирса, уларни хавф остига қўйса ҳамда Эроннинг ҳарбий-деңиз блокадасини давом эттирса, Эрон қуролли кучларининг Яқин Шарқдаги АҚШ ҳарбий кемаларига берадиган зарбалари илгаригидан ҳам кучлироқ бўлади”, дейди Золфагари. 

Эслатиб ўтамиз, аввалроқ Эрон ўз кучига ишонч ҳис қилаётгани ва АҚШ разведкаси баҳолашига кўра, яқин ойларда АҚШ билан низони авж олдиришга қарор қилиши мумкинлиги ҳақида хабар берилган эди.