Суд Трампни айбдор деб топганидан сўнг унинг сайлов кампанияси 53 млн доллар йиғди
Олам
−
01 Июнь
6496АҚШнинг собиқ президенти Дональд Трамп Нью-Йоркдаги ҳакамлар ҳайъати томонидан жиноий иш бўйича айбдор, деб топилгандан кейин 24 соат ичида унинг сайловолди кампанияси 53 миллион долларга яқин маблағ йиғди. Бу ҳақда “The New York Times” нашри хабар берди.
Қайд этилишича, 2023 йилнинг сўнгги олти ойида Трамп жамоаси деярли бир хил – 58 миллион доллар йиғишга муваффақ бўлган. Ҳукм чиқарилгач, дастлабки бир неча соат ичида Трамп 35 миллион доллар тўплаган, кейинчалик у 52,8 миллион долларга кўтарилган.
Бундан ташқари, сўнгги 24 соат ичида донорларнинг деярли 30 фоизи илгари кампанияни қўллаб-қувватламаган янги манбалар экани маълум бўлди. Маълумот учун, май ойида Жо Байденнинг сайлов кампаниясида 84 миллион доллар, Трампнинг сайловолди кампаниясида эса 49 миллион доллар бор бўлган.
Эслатиб ўтамиз, Нью-Йорк ҳакамлар ҳайъати бир овоздан Трампни собиқ порноактриса Сторми Даниэлсга тўловларни яшириш учун бизнес ёзувларини сохталаштиришда айбдор деб топди. У АҚШ тарихида жиноят содир этганликда айбдор, деб топилган биринчи собиқ президент бўлди. Судья Хуан Мерчан ҳукмни 11 июлга, Дональд Трампнинг АҚШ президентлигига номзод сифатида расман эълон қилиниши керак бўлган Милуокидаги Республикачилар партияси қурултойидан бир неча кун олдинга белгилади.
Ҳабиб Жўрабоев
LiveБарчаси