Собиқ ички ишлар вазири президентликка даъво қилди

Қирғизистоннинг собиқ ички ишлар вазири, сиёсатчи Омурбек Сувоналиев мамлакатда 2027 йилда бўлиб ўтадиган президентлик сайловида номзод сифатида қатнашиш нияти борлигини билдирди. Бу ҳақда у кеча, 24 сентябрь куни “Азаттык” радиосига берган интервьюсида маълум қилди.

Омурбек Сувоналиев ўзини кўп йиллардан бери сиёсат билан шуғулланиб келаётган шахс сифатида сайловда амалдаги президентга рақобат қила оладиган номзод деб ҳисоблашини айтган. У шу мақсадда мухолифат кучларини бирлаштиришга ҳаракат қилишини ҳам маълум қилган.

“Менинг 2027 йилда сайловда номзод сифатида қатнашиш ниятим бор. Мен сайловга бораман ва охиригача қатнашаман. Бу сиёсий кураш, мен ўз номзодимни илгари сураман”, деган Сувоналиев.

Унинг айтишича, Қирғизистонда сиёсий майдон сўнгги йилларда анча қисқарган. Сувоналиев, шунингдек, айрим сиёсатчиларнинг ҳибсга олингани ёки сиёсий фаолияти чеклангани ҳақида ҳам гапирган.

Маълумот учун, 66 ёшли Омурбек Сувоналиев аввал Қирғизистон ички ишлар вазири лавозимида ишлаган, шунингдек, Норин ва Талас вилоятларига раҳбарлик қилган. У 2019–2020 йилларда Қирғизистон Хавфсизлик кенгаши котиби ўринбосари лавозимида ҳам фаолият юритган.

Сувоналиев 2011 йилда ҳам президентлик сайловида ўзини ўзи номзод сифатида кўрсатган.

Қирғизистон Жогорку Кенеши кеча, 24 сентябр куни навбатдаги президентлик сайловини 2027 йил 27 январда ўтказиш ҳақида қарор қабул қилган.

Эслатиб ўтамиз, аввалроқ амалдаги президент Садир Жапаров аввалроқ сайловда яна номзодини қўйишини билдирган ва барча номзодлар учун тенг шароит яратишга ваъда берганди.