Сирдарёда фуқарони Туркияга фоҳишалик учун сотаётган аёл қўлга тушди (видео)

Фарғона вилояти Фарғона шаҳрида яшовчи фуқаро Сирдарё вилояти Гулистон шаҳрида яшовчи фуқарони фоҳишалик қилиш учун Туркияга Фарғона халқаро аэропорти орқали олиб кетаётган вақтда тўхтатиб қолинди. Бу ҳақда Сирдарё вилояти Ички ишлар бошқармаси хабар берди.

Жабрланувчининг сўзларига кўра, Instagram орқали танишган аёл унга Туркияга бориб, энагалик қилишини айтган ва сафар чиптасини, шунингдек, қолган харажатларни қоплашига ишонтирган. Қиз унга Telegram орқали “загран” паспортининг расмини юборган. Шундан сўнг улар Туркияга учиш учун кетаётганда қўлга тушган.

“У ёққа борганимда ҳолим қандай бўлишини ҳеч тасаввур қилолмайман. Ҳуқуқни муҳофаза қилиш органларига катта раҳмат айтаман. Аэропортдан келганимиздан кейин менга жуда катта ёрдам қилишди. Ўзимни тенгдошларимга шуни айтиб қоламан: агар чет элда иш таклиф қилса, билетларингни олиб бераман, харажатларингни ҳаммасини кўтариб бераман деса, ички ишлар ходимларига мурожаат қилишларингизни сўрайман, эртага одам савдоси қурбони бўлиб қолмасликларингизни илтимос қиламан”, дейди у.

Билдирилишича, ҳозирда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Жиззах вилояти Дўстлик туманида 29 ёшли эркак 23 ёшли аёлни Россияга сотиб юбормоқчи бўлган вақтида қўлга олинган эди. Дўстлик тумани суди эркакни Жиноят кодексининг 135-моддаси 1-қисми (Одам савдоси) билан айбли деб топган ва унга нисбатан 3 йил 6 ой муддатга озодликни чеклаш жазоси тайинлаганди.