Си Цзиньпин Ҳиндистонга яна махсус “тойчоғида” борди

Хитой раҳбари Си Цзиньпин хорижий давлатларга ташрифлари чоғида мезбон томоннинг автомобилидан эмас, ўзига махсус тайёрланган бронланган лимузинидан фойдаланади. Кеча, 12 сентябрь куни BRICS саммитида қатнашиш учун Ҳиндистонга ташриф буюрган Хитой раисининг махсус авто-улови ОАВда қизғин муҳокама қилинди. Бу ҳақда Ҳиндистоннинг “Free Press Journal” нашри хабар берди.

Қайд этилиши, “Қизил байроқ” маъносини англатувчи Hongqi N701 модели Хитой раҳбари учун махсус яратилган бўлиб, эркин савдода сотилмайди.

Айни кунларда Си Цзиньпин Нью-Деҳлида бўлиб ўтаётган BRICS саммитида иштирок этяпти. Маҳаллий ОАВ вакиллари Хитой раисига тегишли махфий автомобилни кўришга уриниб, унинг қалин махсус чехол билан қопланганини хабар қилган.

Лимузиннинг узунлиги қарийб 5,5 метр, оғирлиги эса 3 тоннадан ортиқ. Автомобилни йирик хромланган радиатор панжараси, қорайтирилган фаралари ва қизил байроқ кўринишидаги белгилари орқали таниш мумкин.

Нашрга кўра, N701’нинг энг муҳим хусусиятлари унинг ташқи кўриниши ортида яширинган. Автомобиль кучайтирилган броня, ўқ ўтмайдиган ойна ва шикастланган тақдирда ҳам ҳаракатни давом эттириш имконини берувчи мустаҳкамланган ғилдираклар билан жиҳозланган.

Журналистлар лимузинда кимёвий ва биологик таҳдидлардан ҳимоя қилувчи мустақил ҳаётни таъминлаш ва ҳавони босим остида узатиш тизимлари, шунингдек, хавфсиз алоқа канали учун ҳимояланган коммуникация тизими мавжудлигини қайд этган. Бронянинг аниқ параметрлари ва автомобилнинг техник жиҳозлари махфий сақланади.

Маълум бўлишича, махсус автомобиль 6 литрлик V12 двигателига эга бўлиб, унинг қуввати қарийб 408 от кучини ташкил этади. Лимузин аввал ҳам Си Цзиньпиннинг Россия, АҚШ, Гонконг ва Мисрга ташрифлари чоғида уни кузатиб борган.

“Free Press Journal” нашрининг ёзишича, Си Цзиньпиннинг автомобили Ҳиндистонда пайдо бўлиши BRICS саммитининг оддий логистика тафсилоти эмас. Махсус лимузин хавфсизлик, сиёсий рамз ва Хитойнинг саноат имкониятлари намойишини бирлаштиради.

Маълумот учун, бренд 1958 йилда First Automotive Works компанияси томонидан Хитой раҳбариятига хизмат кўрсатиш учун ташкил этилган. Дастлабки автомобиллар қўлда йиғилган ва улар Мао Цзэдун билан боғлиқ рамз сифатида қабул қилинган.

Кейинчалик бренд ўз нуфузини йўқотган, аммо Си Цзиньпин даврида қайта тикланиб, технологик мустақиллик ва миллий ғурур рамзига айлантирилган.