Швецияда болалари тиш ювмагани учун ота-она қамалди

Швецияда ота-она фарзандларининг тишларини етарлича парвариш қилмагани учун саккиз ойлик қамоқ жазосига ҳукм қилинди. Бу ҳақда “Aftonbladet” нашри хабар берди.

Қайд этилишича, ота-онанинг мактабгача ёшдаги уч нафар боласи – бир қиз ва икки ўғлининг тишлари тиббий кўрик чоғида чуқур кариес билан зарарлангани аниқланган. Ҳолат шу даражада оғир бўлганки, баъзи тишларни олиб ташлашга тўғри келган.

Қизча наркоз остида 8 та тишидан ажралган. Ўғил болалар эса 4 тадан тишини йўқотган. Оғиз бўшлиғининг ёмон ҳолати оқибатида уларда йирингли яллиғланишлар, инфекциялар ва оғриқли яллиғланишлар ҳам пайдо бўлган.

Прокурор София Брюнгельссон бу ҳолатни “жиноят” деб атаган.

“Ота-оналар болаларига ғамхўрлик қилиш учун жавобгардир. Бу ерда кўрилаётган эътиборсизлик даражаси жиноят деб ҳисобланади”, деган у.

Прокурор бу иш бўйича ота-оналарни қамоқ жазосига ҳукм қилиш тарафдори эканини билдириб ўтган.

Суд жараёнида ота-оналар ўз айбини инкор қилган, бироқ судья уларнинг фарзандларига тўғри тиш парвариши кўрсатмаганини инобатга олиб, ҳар бирига 8 ойлик қамоқ жазоси тайинлаган.