16 ёшли ўсмирнинг қовоғида тиш ўсиб чиқди

Ҳиндистонда 16 ёшли ўсмирнинг чап қовоғи шишиб, бир неча ой ўтгач, қовоқ билан қош орасидаги терини тешиб чиққан иккита оқ, ўткир учли жисм пайдо бўлди. Бу хақда “Меdical Daily” нашри ҳабар берди.

Қайд этилишича, бу ноодатий ҳолат Ҳиндистоннинг Мадурай шаҳридаги Аравинд кўз касалхонаси шифокорлари томонидан ўрганилган. Офтальмологлар ҳолатни “Ophthalmology” журналида “Кўз косасининг юқори қисмида жойлашган эктопик ит тиши” номи остида баён қилган.

Шифокорларнинг маълум қилишича, ўсмирдаги шиш оғриқсиз бўлган. У шифохонага тери орасидан тишга ўхшаш қаттиқ жисмлар чиқиб қолганидан тахминан бир ой ўтиб мурожаат қилган.

Дастлаб мутахассислар бу ҳолат тератома – таркибида соч ёки тиш каби тўқималар бўлиши мумкин бўлган ўсма ёки кўз қовоғига кириб қолган бегона жисм билан боғлиқ бўлиши мумкинлигини кўриб чиққан.

Бироқ компьютер томографияси текшируви кўз косасининг юқори қисмида битта тиш ўсганини аниқ кўрсатган. Шифокорларнинг айтишича, тери орасидан чиққан иккита ўткир учли жисм алоҳида тишлар эмас, балки битта тишнинг қисмлари бўлган. Мутахассислар тишни муваффақиятли олиб ташлаган. Ҳолат ҳақидаги илмий ҳисобот жорий йилнинг январь ойида интернетда эълон қилинган, кейинчалик журналнинг июнь сонида чоп этилган.

Ҳолатни ўрганган шифокор Мегана Танварнинг айтишича, бу кўз косасининг юқори қисмида жойлашган эктопик тишнинг биринчи ва ягона қайд этилган ҳолатидир.

Эслатиб ўтамиз, аввалроқ Австралиянинг Квинсленд штатида жуда ноодатий туғма аномалияга эга бузоқча дунёга келган эди – унинг бошидан тўғридан тўғри иккита қўшимча оёқ ўсиб чиққан.

Маржона Маманиёзова