Sergelidan eksklyuziv: portlagan omborda 5 nafar qorovul bo‘lgan

Xabaringiz bor, joriy yilning 28 sentyabr kuni Toshkent shahri Sergeli tumanidagi “Quruvchilar” dahasida joylashgan “Inter Logistics” MCHJga qarashli omborxonaning portlashi oqibatida 163 kishi jarohatlandi. 2006 yilda tug‘ilgan Abrorxo‘ja Abbosxo‘jayev vafot etdi. 

Mana, uch kundirki, QALAMPIR.UZ jamoasi voqea sodir bo‘lgan hududda bo‘lib turibdi. Rasmiylar voqea guvohi bo‘lganlar va jarohatlanganlar bilan muloqot qilmoqda. QALAMPIR.UZ’ning e’tibori hamon “Inter Logistics” MCHJga qarashli omborda qolmoqda. Bizningcha, portlash sodir bo‘lgan hududda eng kamida omborning ikkita qorovuli bo‘lgan va ularning ahvoli qanday. Agar portlash ombordan katta uzoqlikdagi uylarga shunchalik ta’sir qilib, odam o‘lishigacha olib kelgan bo‘lsa, unda qorovullarning ahvoli qanday? 

Hozircha bu savollarimizga birorta rasmiy javob bergani yo‘q. 

QALAMPIR.UZ o‘z manbalari orqali qo‘lga kiritgan ma’lumotlarga qaraganda, “Inter Logistics” MCHJga qarashli ombor hududida o‘sha tunda 5 ta qorovul faoliyat olib borayotgan bo‘lgan. Ular payqaganida zudlik bilan Yong‘in xavfsizlik xizmatiga xabar bergan va yong‘inni o‘chirishga harakat qilgan. 

“Qorovullar olov hududi kengayib, mashinalarga o‘tib ketmasligi uchun ancha harakat qilgan. Hatto, choponi bilan alangani o‘chirishga harakat qilgan. Portlash sodir bo‘lgan vaqtda, ular hududning xavfsiz qismida bo‘lib, omon qolgan”, deydi QALAMPIR.UZ bilan suhbatlashgan manba. 

Eslatib o‘tamiz, mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atilgan.

Portlash oqibatida hududdagi 26 ta ko‘p qavatli uyning 592 ta xonadoni, 8 ta xizmat ko‘rsatish shoxobchasi, 1 ta maktab va 2 ta bog‘cha binolarining fasad qismi hamda deraza romlariga zarar yetgani aniqlangan.

Shuningdek, hududdagi 24 ta ko‘p qavatli uy va 25 ta hovlining fasad, oyna-rom va tom qismi zarar ko‘rgan.