Сербияда юз минглаб одамлар муддатидан олдин сайловларни талаб қилмоқда

Кеча, 1 сентябрь куни Сербияда йирик норозилик намойишлари бўлиб ўтди ва унда намойишчилар муддатидан олдин сайловлар ўтказилишини талаб қилиб, кўчага чиқди. Бу ҳақда “Reuters” хабар берди.

Мамлакат пойтахти саналмиш Белград ва бошқа шаҳарларда ўн минглаб одамлар 2024 йилнинг ноябрида Нови-Саддаги темирйўл вокзалида том қулаши оқибатида ҳалок бўлган 16 кишини хотирлаб, кўчаларда юриш қилган.

Намойишчилар фожианинг илдизи коррупция эканини таъкидлаб, Президент Александар Вучичнинг Сербия прогрессив партиясини ҳокимиятдан четлатиш учун муддатидан олдин парламент сайловларини ўтказишни талаб қилмоқда.

Дастлаб, Белграднинг Савская майдонида 16 спортчи қўлида оқ атиргуллар билан юрган, шу пайтда Нови-Саддаги фожиа қурбонларининг исмлари ўқиб эслатилган. Шунга ўхшаш митинглар Нови-Сад, Алексинац каби шаҳарларда ҳам ўтказилган.

Вучич намойишчиларнинг талабларига жавобан демократик давлатларда норозилик пайтида сайловларни ўтказиш мумкин эмаслиги, бу “фуқароларнинг ўзига зарар келтиришини” айтган. 

Қайд этиш жоиз, 2024 йил 1 ноябрда Нови-Саддаги таъмирдан чиққан вокзалнинг бетон томи қулаб, 6 ёшдан 74 ёшгача бўлган 16 кишининг ҳаётига нуқта қўйганди. Шундан сўнг, қурилиш вазири Горан Весич истеъфога чиқди ва у 12 киши билан бирга қўлга олинди.

Фожиа ортидан мамлакат халқи қўзғалди, 1996 йилдан бери энг йирик деб баҳоланган норозиликлар авж олди. Жамоатчилик бу воқеада коррупция, бепарволик, қурилишдаги хавфсизлик қоидаларига амал қилинмагани ҳамда ҳукуматдаги қариндош-уруғчиликни асосий сабаб деб урғуламоқда. 

Эслатиб ўтамиз, аввалроқ Сербия Президенти Александр Вучич ҳокимиятни сақлаб қолиш учун конституцияни ўзгартирмаслиги ва ўз номзодини қайта илгари суришни режалаштирмаётганини айтганди. Александр Вучичга кўра, келажакдаги президент сайловлари ҳам амалдаги қонунчиликка мувофиқ ўтказилади.