Сенатор Трампни Фаластинни тан олишга чақирди

АҚШ сенатори Жефф Мёркли Президент Дональд Трампни Фаластин давлатини расмий тан олишга чақирди. У тарихда биринчи марта АҚШ Сенатида шундай резолюция тақдим этди.

АҚШнинг Орегон штатидан сайланган сенаторнинг баёнотида айтилишича, резолюция етти нафар демократ сенатор ва битта мустақил сенатор томонидан қўллаб-қувватланган. Унда АҚШ Президенти Фаластин давлатини тан олиши кераклиги таъкидланган.

Ҳужжатда икки давлат ечими Фаластин ва Исроил хавфсизлиги ҳамда фаровонлиги учун муқаррарлиги қайд этилиб, 1967 йилги чегараларга оид БМТ Хавфсизлик Кенгашининг 242-резолюциясига ишора қилинган. Шунингдек, АҚШ халқаро ҳуқуқ ва икки давлатли ечим тамойиллари асосида хавфсиз Исроилни ва “демилитаризация қилинган” (ҲАМАС кучларидан тозаланган) Фаластин давлатини тан олиши лозимлиги ёзилган.

Резолюцияда, бундан ташқари, Фаластин раҳбариятидан Европа давлатларига берган ваъдасини бажариб, 2026 йилда сайлов ўтказиш ҳамда ҲАМАСни қурол ташлашга чақириш талаблари бор.

Мёрклининг сўзларига кўра, Фаластин давлатини тан олиш АҚШнинг нафақат амалий қадами, балки тўғри қарори бўлади. У Америка бу борада етакчилик кўрсатиши шартлигини таъкидлаган. Сенатор, шунингдек, биринчи навбатда ўт очишни тўхтатиш, асирларни озод қилиш ва гуманитар ёрдам етказиб бериш зарурлигини айтган. Унинг фикрича, келажакда тинчлик ва фаровонликка эришишнинг ягона йўли икки давлат ечимидир ва Фаластин давлатини барпо этиш мақсадини энди ортга суриб бўлмайди.

Резолюцияни Мёркли билан бир қаторда демократ сенаторлар Крис Ван Холлен, Тим Кейн, Питер Уэлш, Тина Смит, Тэмми Болдуин, Мейзи Ҳироно ҳамда мустақил сенатор Берни Сандерс қўллаб-қувватлаган. 

Эслатиб ўтамиз, аввалроқ Америка Қўшма Штатлари Ғазо секторида “зудлик билан, сўзсиз ва доимий” ўт очишни тўхтатишни, шунингдек, Исроил томонидан Фаластин ҳудудига инсонпарварлик ёрдами бўйича барча чекловларни олиб ташлашни талаб қиладиган Бирлашган Миллатлар Ташкилоти Хавфсизлик Кенгаши резолюцияси лойиҳасига вето қўйганди. Резолюция лойиҳаси БМТ Хавфсизлик Кенгашининг 15 нафар аъзоларидан ўнтаси томонидан тайёрланган.