Саудия қаҳрамонлари Тошкентга қайтди

Саудиядан учган самолёт Тошкент вақти билан 20:00 лар атрофида маҳаллий аэропортга келиб қўнди. Ўзбекистон ҳукумати, футболчиларнинг яқинлари, кенг жамоатчилик вакиллари, ОАВ Осиё чемпионларини қарши олди ва албатта, футболчилар билан доим бирга юрадиган, аслида жойи трибунада бўлган шахс ҳам шу ерда.

ОАВга интервью бераркан, жамоа устози Ислом Исмоилов ҳозирги жамоани шакллантиришга қанча вақт кетганини, бу жамоани ҳозирги ҳолатига олиб келиш осон бўлмаганини ва албатта, драматик финал ҳақида ўз фикрларини билдирди.

Жамоа етакчиларидан бири, финалдаги шедевр гол муаллифи ва Осиё кубогининг энг яхши футболчиси Садриддин Ҳасанов ҳам ўз ҳис-ҳаяжонлари билан ўртоқлашди.

Ниҳоят, интервьюлардан ортиб, аэропорт йўлагидан чиқиб келган футболчиларга Ўзбекистон Республикаси Бош вазири Абдулла Арипов томонидан Президент табриги ўқиб эшиттирилди.

Президент Администрацияси департамент раҳбари Одил Абдураҳмонов Ўзбекистон Республикаси Президентининг “Футбол бўйича ўн етти ёшгача бўлган ўсмирлар ўртасидаги Осиё кубоги ўйинлари ғолиблари ва иштирокчиларини мукофотлаш тўғрисида”ги фармонини ўқиб эшиттирди ва футболчиларга ҳукумат вакиллари томонидан автомобиллар калитлари топширилди.

Ниҳоят, энг ҳаяжонли лаҳзалар бошланди. Футболчилар ўзларига аталган автомобилларни қидира бошлади. Аммо 17 ёшда уларга автомобиль бошқариш мумкин эмас, шунинг учун Осиё чемпионлари Президент совғаларини ота-оналарига, ўз яқинларига туҳфа этди. Олдинда бу жамоани ноябрь ойида Қатарда ўтадиган мундиал баҳслари кутиб турибди, шу сабабли футболчиларнинг ҳам, мураббийларнинг ҳам ортиқча эйфорияга берилишга ҳаққи йўқ, зеро жўжа кузда саналади.