Саудия Арабистони подшоҳи пневмонияга чалинди

Саудия Арабистони қироли, 88 ёшли Салмон бин Абдулазиз Ол Сауд пневмония билан касалланган ва шунинг учун Жиддадаги Ал-Салом саройидаги ихтисослаштирилган клиникада антибиотиклар билан даволанади. Бу ҳақда Саудия Арабистони матбуот агентлиги тарқатган қироллик идораси баёнотида айтилади.

Кеча, 19 май куни 88 ёшли монарх Ал-Салом саройида тиббий кўрикдан ўтган. Подшоҳ иситма ва бўғимлардаги оғриқлардан шикоят қилган. Текширувдан сўнг Саудия монархининг соғлиғини кузатувчи тиббий гуруҳ уни даволаниш муддати давомида шифохонага ётқизишга қарор қилди.

24 апрель куни Салмон бин Абдулазиз Ол Сауд режали тиббий кўрикдан ўтиш учун шифохонага ётқизилган эди. Ўша куни идора қиролнинг соғлиғи хавф остида эмаслигини маълум қилди, шунинг учун у текширув ўтказилган клиникани тарк этди.

Маълумот учун, Салмон бин Абдулазиз Ол Сауд Саудия Арабистони раҳбариятини 2015 йилнинг январида қабул қилиб олган. Унинг ўғли ва валиаҳд шаҳзода, 38 ёшли Муҳаммад бин Салмон Ол Сауд узоқ вақтдан бери мамлакатдаги кундалик ишларнинг аксарият қисмини бошқариб келади.

2022 йил сентябрь ойида Буюк Британия қироличаси 96 ёшли Елизавета II вафот этиши билан қирол Салмон бин Абдулазиз Ол Сауд дунёдаги энг кекса монархга айланди. Декабрь ойида у 89 ёшга тўлади.