Саркози қарсаклар остида қамоқхонага олиб кетилди (видео)

Франциянинг беш йилга озодликдан маҳрум этилган собиқ президенти Николя Саркози бугун, 21 октябрь куни қарсаклар остида қамоқхонага жўнатилди. Бу ҳақда “Reuters” хабар берди.

Жорий йилнинг 25 сентябрь куни Париж суди Николя Саркозини Ливия ҳукумати билан фитна уюштириб, сайлов кампаниясини ноқонуний молиялаштиришда айбдор деб топган эди.

Маълум бўлишича, Саркози бугун, 21 октябрь куни Париждаги “Санте” қамоқхонасининг ҳимояга муҳтож маҳбуслар учун мўлжалланган бўлимига жойлаштирилган. Воқеа жойидан олинган видеоларда унинг кўплаб тарафдорлари собиқ президентни қарсаклар билан кузатаётгани акс этган.

Николя Саркози иши

Саркози Ливиянинг марҳум раҳбари, полковник Муаммар Каддафийдан миллионлаб ноқонуний маблағларни олиш билан боғлиқ иш бўйича жиноий тил бириктиришда айбдор деб топилган. Суд Саркозини 2005-2007 йиллардаги “жиноий фитнада иштирок этиш”да айбдор деб топди, бироқ уни давлат маблағларини ўғирлаш ва пассив коррупцияда оқлади. Прокурорлар Саркозига 7 йиллик қамоқ жазоси, 300 минг евро жарима ва давлат лавозимларида ишлаш ҳуқуқидан 5 йилга ман этишни сўраган эди. У беш йиллик қамоқ жазосига ҳукм қилинди. Ҳукм у апелляция берган тақдирда ҳам қамоқда ўтиришини билдиради. Ҳукм кўпчилик кутганидан қаттиқроқ ва замонавий Франциянинг сиёсий тарихида биринчиси бўлди.  Бу ишда Саркозидан ташқари яна 11 киши, жумладан ҳукуматнинг собиқ аъзолари ҳам бор. Саркозининг собиқ аппарат раҳбари Клод Геан (у учун бу биринчи судланганлик эмас) 500 минг евро олганлик учун пассив коррупция, шунингдек, ҳужжатларни қалбакилаштириш ва “таъсир ўтказиш”да айбдор деб топилди. Собиқ вазир Брис Ортфе “жиноий тил бириктиришда иштирок этиш”да айбдор деб топилди, бироқ бошқа айбловлар бўйича оқланди. Саркози ва Каддафийнинг яқин доиралари ўртасида воситачи бўлиб ишлаган тадбиркор Александр Жухри коррупция ва таъсир ўтказишда айбдор деб топилди. Маълумот учун, Саркози Францияни 2007-2012 йилларда бошқарган.