Санкт-Петербургда мигрантларнинг миллатини аниқловчи камералар ўрнатилади

Россиянинг Санкт-Петербург шаҳрида 8 мингта кузатув камералари этник идентификацияни аниқлаш учун созланади. Бу ҳақда “Коммерсанть” хабар берди.

Нашрнинг ёзишича, мансабдорлар камералар ёрдамида мигрантларни ва уларнинг зич яшаш жойларини кузатмоқчи эканини билдирган. Россия Президенти ҳузуридаги Инсон ҳуқуқлари бўйича кенгаш эса мансабдорларнинг этник идентификацияни камера тасвиридан аниқлаш ҳақидаги баёнотини “инсон қадр-қимматини таҳқирловчи” деб атаган.

Шаҳар камераларини созлаш бўйича баёнот билан Санкт-Петербург маъмуриятининг миллатлараро муносабатлар қўмитаси раҳбари Олег Капитанов чиққан. Ҳукумат йиғилишида ҳисобот билан чиқиш қилар экан, у “Хавфсиз шаҳар” ахборот тизимининг янги функционал имконияти – “шахсларнинг этник мансублигини аниқлаш механизми” ҳақида гапирган. Ушбу механизм Капитановнинг тушунтиришича, “этник анклавларнинг шаклланишига қарши курашиш” учун ишлаб чиқилган бўлиб, у минтақада ижтимоий тангликнинг олдини олиш бўйича ўз вақтида профилактик чоралар кўриш имконини беради.

Капитанов, шунингдек, ушбу янги функционал имконият 8 мингта шаҳар камерасига ўрнатилишини қўшимча қилиб, унинг қўмитаси аллақачон шахсларнинг этник мансублигини аниқлаш учун лицензия сотиб олиш бўйича шартнома тузганини айтган (“Коммерсанть” маълумотларига кўра, бунинг учун 38,4 миллион рубль сарфланади).

Унинг сўзларига кўра, 2024 йилда шаҳар аҳолининг атиги 43 фоизи миллатлараро муносабатлар ҳолатини ижобий баҳолаган, бу эса маъмурият кутган 62 фоиздан анча паст. Худди шу йиғилишда сўзга чиққан Давлат думаси депутати Михаил Романов эса пиёдалар йўлакларида электр велосипедларда ҳаракатланиб, одамларни уриб кетаётган мигрант-курьерлар ҳақида шикоят қилган.

Санкт-Петербург маъмуриятининг Ахборотлаштириш ва алоқа қўмитаси “Хавфсиз шаҳар”ни ривожлантириш доирасида 2024 йил охирида “шахсларнинг этник мансублигини аниқлаш дастурий таъминотидан фойдаланиш ҳуқуқи учун лицензия” сотиб олинганини тасдиқлаган.

“Бу функционал имконият оммавий тадбирлар чоғида тартиб ва хавфсизликни таъминлаш учун ресурсларга бўлган эҳтиёжни аниқроқ прогноз қилиш, турли тилларда сўзлашувчи волонтёрлар ва ҳуқуқни муҳофаза қилиш органлари ходимларини жалб қилишни оптималлаштириш имконини беради”, дея тушунтирган қўмита.

Инсон ҳуқуқлари кенгаши раҳбари Валерий Фадеев этник анклавларнинг шаклланишини аниқлаш учун мураккаб дастурий мажмуага эга 8 мингта камера нега керак деган савол қўйган.

“Петербург ва бошқа исталган шаҳар ҳокимияти анклавлар қаерда шаклланаётганини аллақачон билади”, дея фикр билдирган у.

МДҲ мамлакатлари институти директор ўринбосари Александр Докучаев эса Санкт-Петербург технологияси, масалан, “қозоқларни якутлардан қандай фарқлаши” билан қизиққан. У ташаббусни “ғалати” деб атаган.

“Бу баёнот хато, у фақат таранглик ва миллатлараро адоватни кучайтиради. Бу жиҳатдан давлат лавозимидаги одамларнинг компетентлигига жиддий саволлар туғилади”, дейди у.

Валерий Фадеев камералар орқали “этник идентификация”ни аниқлаш масаласини “инсон қадр-қимматини камситувчи” деб баҳолаган.

“Ҳатто Россия паспортида ҳам миллат кўрсатилмайди. Энди эса қандайдир видеокамералар одамнинг миллий мансублигини аниқлайди, дейишмоқда”, дейди Инсон ҳуқуқлари кенгаши раҳбари.

Эслатиб ўтамиз, аввалроқ Россия Давлат думасидаги “Справедливая Россия — За правду” фракцияси раҳбари Сергей Миронов Россияда мигрантларнинг ўз ватанига пул ўтказгани учун 3 фоизлик солиқ жорий этиш таклиф қилган эди. Мироновнинг сўзларига кўра, Ўзбекистон ва Қирғизистон фуқароларига солиқ солинганда ҳам бир йилда бюджетга 45 млрд рубль қолиши мумкин.