Самарқанддаги олийгоҳлар талабаларига таътил берилди

3-4 апрель кунлари Самарқанд шаҳрида биринчи “Марказий Осиё – Европа Иттифоқи” саммити ўтказилиши муносабати билан шаҳардаги айрим олий таълим муассасаларига қисқа муддатли ўқув таътили берилади. Олий таълим, фан ва инновациялар вазирлиги матбуот котиби Назокат Абдуқундузова буни QALAMPIR.UZ'га тасдиқлади.

Маълум қилинишича, 1-5 апрель кунлари қуйидаги олий таълим муассасаларига ёзги таътил ҳисобидан қисқа муддатли ўқув таътили берилади:

• 1. Шароф Рашидов номидаги Самарқанд давлат университети
• 2. Самарқанд давлат чет тиллар институти
• 3. Самарқанд иқтисодиёт ва сервис институти
• 4. “Ипак йўли” туризм ва маданий мерос халқаро университети
• 5. Тошкент ахборот технологиялари университети Самарқанд филиали
• 6. Самарқанд давлат тиббиёт университети
• 7. Ўзбекистон-Финландия педагогика институти

Ушбу таълим даргоҳларида ўқув жараёнлари 7 апрель, душанба кунидан бошланади.

Маълумот учун,  3-4 апрель кунлари Самарқанд шаҳрида “Марказий Осиё – Европа Иттифоқи” саммити бўлиб ўтади. Европа Кенгаши раиси Антонио Кошта ва Еврокомиссия раиси Урсула фон дер Ляйен ушбу саммитда қатнашиш учун Ўзбекистонга келади. Тадбир Ўзбекистон Президенти Шавкат Мирзиёев раислигида, Қозоғистон, Қирғизистон, Тожикистон ва Туркманистон етакчилари иштирокида бўлиб ўтади. 4-5 апрель кунлари эса “Silk Road Samarkand” конгресс марказида биринчи Самарқанд иқлим форуми бўлиб ўтади. Форумда Марказий Осиё давлатлари, жумладан, Ўзбекистон, Қозоғистон, Қирғизистон, Тожикистон ва Туркманистон раҳбарлари, шунингдек, Европа Иттифоқи, БМТ, халқаро молия институтлари ва етакчи экология ташкилотлари вакиллари иштирок этиши кутилмоқда.

Эслатиб ўтамиз, аввалроқ саммит муносабати билан Самарқанд шаҳрига кириш йўллари вақтинча ёпилиши ҳақида хабар берилганди.