Saidov Afg‘oniston va Pokiston TIV rahbarlari bilan chegaradagi vaziyatni muhokama qildi

Bugun, 28 fevral kuni O‘zbekiston Tashqi ishlar vaziri Baxtiyor Saidov telefon orqali Afg‘onistondagi “Tolibon” muvaqqat hukumati tashqi ishlar vaziri Mavlaviy Amir Xon Muttaqiy bilan Afg‘oniston – Pokiston chegarasidagi vaziyatni muhokama qildi. Bu haqda Saidov o‘zining Telegram-kanalida ma’lum qildi.

“Suhbat davomida Afg‘oniston – Pokiston chegarasidagi mavjud vaziyat yuzasidan fikr almashdik hamda vazminlikni saqlash va vaziyatning yanada keskinlashuviga yo‘l qo‘ymaslik muhimligini ta’kidladik”, deyiladi xabarda.

Shuningdek, muloqotda barqarorlikni ta’minlash va mavjud xavf-xatarlarni bartaraf etishda muloqot asosiy vosita bo‘lib qolishi zarurligi tasdiqlangan.

Shuningdek, Baxtiyor Saidov Pokiston Islom Respublikasi Bosh vazir o‘rinbosari va Tashqi ishlar vaziri, senator Muhammad Is’hoq Dor bilan ham telefon orqali muloqot qilib, Pokiston va Afg‘oniston o‘rtasidagi so‘nggi vaziyat yuzasidan fikr almashgan.

Suhbat davomida vazminlikni saqlash va vaziyatni yanada keskinlashuviga yo‘l qo‘ymaslik muhimligini ta’kidlangan. Mavjud qarama-qarshilikni yumshatish va barqarorlikni ta’minlash maqsadida o‘zaro ishonch hamda izchil muloqotning ahamiyati zarurligini alohida qayd etilgan.

Eslatib o‘tamiz, joriy yilning 26 fevral kuni Afg‘oniston Pokiston harbiy-havo kuchlarining afg‘on hududini bombardimon qilganiga javoban, butun “Dyurand chizig‘i” – Qobul tomonidan tan olinmagan ikki davlat o‘rtasidagi chegara bo‘ylab Pokiston harbiylariga qarshi harbiy operatsiya boshlagandi. Pokiston, o‘z navbatida, javob o‘ti ochilganini, keyinroq esa Afg‘oniston bilan “ochiq urush” boshlanganini e’lon qildi.

Kecha, 27 fevral kuni “Tolibon” muvaqqat hukumati Pokiston bilan chegarada yangi hujumlar to‘lqinini boshladi.

Hozirgi keskinlashuv 2025 yil oktyabr oyida boshlangan Pokiston va Afg‘oniston o‘rtasidagi mojaroning davomidir. Tomonlar bir necha bor o‘t ochishni to‘xtatish haqida bayonot bergan, biroq chegarada tinchlik bo‘yicha kelishuvga erisha olmagan. Islomobod Qobulni terrorchilarga boshpana berishda ayblamoqda, Afg‘oniston rasmiylari esa bu ayblovlarni rad etib keladi.

O‘zbekiston Respublikasi Afg‘oniston va Pokiston o‘rtasidagi chegara hududida vaziyatning keskinlashayotganidan chuqur xavotirdaligini bildirdi.