Рубио Кубани жуда кеч бўлмасдан олдин “ақлини йиғиб олишга” чақирди

АҚШ Давлат котиби Марко Рубио Куба расмийларини жуда кеч бўлмасдан олдин позицияни ўзгартиришга ҳамда ислоҳотлар, тинчлик ва фаровонлик фойдасига танлов қилишга чақирди. Унинг бу ҳақдаги баёноти Давлат департаменти сайтида эълон қилинди.

Дипломатнинг билдиришича, Кубада иштирокчилари яхшироқ келажакни талаб қилган норозилик намойишлари ўтказилганидан бери беш йил ўтган бўлса-да, намойишларда ҳибсга олинганлар ҳанузгача панжара ортида қолмоқда. АҚШ Кубани барча сиёсий маҳбусларни озод қилишга чақирган.

“Ўн йиллик қатағонлар ва қўпол иқтисодий бошқарувдан сўнг, Куба иқтисодиёти эркин қулашни бошдан кечирмоқда, унинг халқи эса электр таъминотидаги узилишлар, очликдан азият чекишда давом этмоқда”, дейилади пресс-релизда.

Рубио Куба расмийлари ва элитаси ислоҳотларни рад этишда ҳамда АҚШ душманлари билан иттифоқ тузишда давом этаётганини алоҳида таъкидлаган. Бундай шароитда Вашингтон Гаванадан бўлаётган миллий хавфсизликка таҳдидларга қарши барча воситалар билан курашишни ва мамлакатда сиёсий ҳамда иқтисодий ислоҳотлар ўтказилишини ёқлаб чиқишни давом эттириш ниятида.

Эслатиб ўтамиз, аввалроқ Куба Президенти Мигель Диас-Канель Оқ уй раҳбари Дональд Трампнинг мамлакат шаънига айтган баёнотларига муносабат билдирганди ва АҚШ билан юзага келиши мумкин бўлган низо ҳақида гапирган эди.