Роуп-жампинг пайтида 21 ёшли қиз ҳалок бўлди (видео)

Бразилиянинг Лимейра шаҳридаги роуп-жампинг аттракционида 21 ёшли қиз ҳалок бўлди. Йўриқчилар хавфсизлик арқонини боғлашни унутиб, уни 40 метрлик баландликдан пастга ташлаб юборган. Бу ҳақда “G1” канали хабар берди.

Фожиа жорий йилнинг 13 июнь куни Сан-Паулу штатидаги “Skeleton Bridge” (Скелет кўприги) деб номланувчи кўприкда содир бўлган. Ижтимоий тармоқларда тарқалган видеода қиз жарликка ташланаётган пайтда арқон ерда ётганини кўриш мумкин. Кейинги кадрларда эса “Арқон, арқон!” деган бақириқлар эшитилади.

Фожиадан сўнг компаниянинг уч нафар ходими қўлга олинган ва уларга нисбатан эҳтиётсизлик ортидан одам ўлдириш айблови қўйилган. Улар воқеа қандай содир бўлганига аниқ жавоб бера олмаган.

“Уларнинг боши қотиб қолган, чунки улар узоқ вақтдан бери роуп-жампинг ташкил қилиш билан шуғулланиб келишган”, дейди полиция.

Дастлабки маълумотларга кўра, воқеадан кейин гумонланувчилардан икки нафари яқин атрофдаги ўрмонзор ҳудудга яширинишга уринган. Уларга 12 йилгача озодликдан маҳрум қилиш жазоси хавф солмоқда. Ҳалок бўлган қизнинг яқинлари уларни қонуннинг энг қатъий чоралари билан жазолашни сўраган.

“У ёш, ҳаётга тўла эди ва профессионалларга ишонганди. Бу одамлар ўзларининг масъулиятсизлиги туфайли уни келажагидан маҳрум қилишди”, дейди қизнинг отаси.

Эслатиб ўтамиз, аввалроқ Тожикистоннинг Хўжанд шаҳрида кучли шамол оқибатида ҳаво шари бошқарувни йўқотиб, уйларнинг томига қулаганди. Оқибатда уч киши жароҳатланган.