Россияга қочган Асад илк бор баёнот билан чиқди

Мухолифат гуруҳларнинг Дамашққа ҳужуми туфайли Сурия президенти лавозимини тарк этиб, Россиядан бошпана олган Башар Асад фуқаролар уруши ва ундан кейинги воқеалар давомида истеъфога чиқиш ёки бошпана сўраш имкониятини бирор марта ҳам кўриб чиқмаганини маълум қилди. Бу ҳақда Башар Асад матбуот хизмати томонидан эълон қилинган баёнотда сўз боради.

Унга кўра, Асад жорий йилнинг 8 декабрь куни эрта тонггача Дамашқда қолган ва фақат ўша куни кечқурун Сурияни тарк этган. Мухолифат қуролли гуруҳлари Дамашққа кириб келганидан сўнг у Суриянинг Латакия вилоятига (Россиянинг Ҳмеймим авиабазаси жойлашган) йўл олган. Пойтахтни тарк этиши “россиялик иттифоқчилар билан мувофиқлаштирилган ҳолда ва жанговар операцияларни кузатишни давом эттириш мақсадида” амалга оширилган. Кечқурун эса у Россияга учиб кетган.

Башар Асадга кўра, пойтахтнинг мухолифат томонидан босиб олингани ҳақидаги хабарни у Дамашқни тарк этгандан кейин эшитган. “Террорчилар” томонидан эгалланган мамлакатда президент бўлиб қолишни у маъносиз деб ҳисоблаган. Асаднинг таъкидлашича, унинг кетишига “охирги ҳарбий позицияларнинг бузилиши ва бунинг оқибатида барча давлат институтларининг фалаж бўлиши” сабаб бўлган.

“Менинг Сурияни тарк этишим режалаштирилмаган эди ва бу жанглар давом этаётган сўнгги соатлардагина содир бўлган, деган иддаолар нотўғри”, дейилади баёнотда.

Маълумот учун, Башар Асад 2000 йилдан бери мамлакатни бошқариб келарди. Унинг оиласи эса 1971 йилдан буён ҳокимиятда эди. “Reuters” нашри манбаларга таяниб, 7 декабрь куни кетишидан бир неча соат олдин Асад махсус хизматлар ва армиянинг 30 нафар юқори лавозимли вакили билан учрашувда Россия ҳарбий ёрдами “йўлга чиққанини” маълум қилганини ёзган. Аммо ўша куни кечқурун у Россия авиабазасига кетган. “Bloomberg” нашри бир нечта номаълум манбаларга таяниб хабар қилишича, мухолифат қуролли гуруҳлари Дамашққа яқинлашаётганида Россия Башар Асад ва унинг оиласига, агар у дарҳол мамлакатни тарк этишга рози бўлса, хавфсиз эвакуацияни таклиф қилган.

Эслатиб ўтамиз, аввалроқ Британиянинг "The Financial Times" газетаси 2018 йилнинг мартидан 2019 йилнинг сентябригача Сурия Марказий банки Россияга самолётда катта миқдорда доллар ва евро экспорт қилгани ҳақида хабар берган эди.