Россияга қарши санкциялар юмшаши ҳам, кучайиши ҳам мумкин – АҚШ

АҚШ Молия вазири Скотт Бессент Россияга нисбатан санкциялар режими ҳам юмшатилиши, ҳам кучайтирилиши эҳтимолини истисно этмаслигини билдирди. Бу ҳақда у “Bloomberg” нашрига берган интервьюсида сўз очди. 

Нашр мухбирининг санкциялар режими бир ёки бошқа йўналишда “мослаштирилиши” мумкинми, деган саволига жавобан вазир бундай воқеалар ривожи эҳтимолини “яхши талқин” деб атаган. У қўшимча қилиб, АҚШ Президенти Дональд Трамп “можарони иложи борича тезроқ якунлашга тўлиқ содиқ” эканини таъкидлаган.

“Кетма-кетлик қуйидагича: украиналикларни иқтисодий алоқалар орқали АҚШга яқинлаштириш, Америка халқини, АҚШ жамоатчилигини бунга ишонтириш ва уларни ўз тарафимизга оғдириш. Кейин эса русларга музокара столига ўтириш кераклигини айтиш – шундай бир ишора биланки, агар керак бўлса, биз санкцияларни кучайтирамиз”, дейди Бессент.

Унинг фикрича, АҚШнинг Украинадаги жиддий иқтисодий манфаатлари мамлакат учун “хавфсизлик қалқони” вазифасини бажаради.

Интервью давомида вазир Украина Президенти Владимир Зеленскийнинг АҚШ Президенти Украина атрофидаги вазият бўйича нотўғри маълумотга эга бўлиши мумкин деган баёнотларини “мутлақо ноўрин” деб атаган ва Дональд Трампнинг Украинада сайловлар ўтказиш зарурлиги ҳақидаги фикрини такрорлаган.

“Эҳтимол, Украина демократик жараён бўйича олдинга силжиши керакдир”, дейди у.

Қайд этиш жоиз, олдинроқ Дональд Трамп Truth Social’даги саҳифасида Украина етакчиси Владимир Зеленскийни “сайловларсиз диктатор” деб атаган эди. Бу орқали у Зеленскийни мамлакатда президентлик сайловлари ўтказишга ундамоқда.

Эслатиб ўтамиз, аввалроқ Жо Байден бошчилигидаги АҚШ маъмурияти Россиянинг энергетика секторини нишонга олган янги ва жиддий санкциялар пакетини жорий этган эди. Бу санкциялар Россия нефти ва суюлтирилган табиий газига (СПГ) қаратилган бўлиб, АҚШ Президенти Жо Байден ва G7 етакчилари томонидан қабул қилинган мажбуриятларнинг бир қисми сифатида Кремлга Украинадаги инқирозни давом эттиргани учун қўшимча иқтисодий харажатлар юклашига қаратилган.