Россияда яна темирйўл портлади

Бугун, 5 июнь куни Россиядаги Воронеж вилоятининг Евдаково ва Сагуни станциялари орасида темирйўл портлатилди. Бу ҳақда “Vesti Voronej” хабар берди.

Маълум қилинишича, ушбу ҳодиса Евдаково ва Сагуни станциялари орасидаги 725-километрда содир бўлган. Поездларнинг ҳаракати бир йўналишда тўхтатилган.

Вагонларнинг рельсдан чиқиб кетиши ҳолати кузатилмаган, жабрланганлар йўқ, воқеа жойига эса махсус хизматлар етиб борган.

“Ҳодиса сабабини аллақачон тезкор хизматлар аниқламоқда, уларнинг вакиллари ҳозирда воқеа жойида. Шунингдек, у ерда Жанубий-Шарқий темирйўлга қарашли авария-қутқарув бригадаси ҳам ишламоқда. Вазиятни шахсан назоратимга олганман”, дея ўз Telegram-каналида ёзиб қолдирган Воронеж вилояти губернатори Александр Гусев.

Темирйўллар қулаши

Жорий йилнинг 31 май куни Брянск вилоятида жойлашган “Пилсино-Вигоничи” йўналишидаги бир йўлакли темирйўл бўлагида автомобиль кўпригининг устки қисми қулаб тушганди. Оқибатда ”Климово–Москва” йўналишида ҳаракатланаётган 86-сонли йўловчи поездининг локомотиви ва вагонлари рельсдан чиқиб кетган. Қолаверса, етти киши ҳалок бўлган ва 70 дан ортиқ одам жароҳат олган. 

Бошқа ҳолатда эса Курск вилоятида темирйўл кўприги поезд билан биргаликда қулаб тушган. Журналист Александр Хинштейннинг хабар беришича, Тростна-Калиновка йўлининг 48-километрида кўприк устидан поезд ўтиб кетаётган вақтида у қулаб тушган. Ҳодиса оқибатида 1 киши жароҳатланган. Поезднинг бир қисми кўприк остидаги автомобиль йўлига ағдарилган. Поезд локомотивида ёнғин бошланган, лекин Фавқулодда вазиятлар хизмати ходимлари уни тезда ўчирган. Қолган вагонлар темирйўл платформасида қолган.

Юқоридаги 2 ҳолат Россия терговчилари томонидан террорчилик ҳаракати деб баҳоланди. 

Россия Президенти Владимир Путин эса жавобгарликни Украина раҳбариятига юклади. https://qalampir.uz/news/putin-ukrainani-terakt-uyushtirishda-aybladi-119893 Путин темирйўллар портлашига алоқадор равишда Украина билан ўт очишни тўхтатиш ёки Киев билан саммит ўтказиш зарурлиги борасида шубҳаларини билдирган.

“Бугун, катта йўқотишлар фонида ва бутун фронт чизиғи бўйлаб чекиниб, Россияни қўрқитишга уринар экан, Киев раҳбарияти террорчилик актларини уюштиришга ўтди. Бундай шароитда қандай қилиб юқори даражадаги учрашувлар ўтказилиши мумкин? Нима ҳақида гаплашилади? Ким террорга таянганлар билан музокара олиб боради? Террорчилар биланми?” деган Россия раҳбари.