Россияда вояга етмаган қизни таҳқирлаган 17 ёшли ўзбекистонлик қамалди

Россиянинг Санкт-Петербург шаҳрида Ўзбекистон фуқароси вояга етмаган қизга жинсий тажовуз қилгани учун 7 йилга озодликдан маҳрум қилинди. Бу ҳақда “Лента” нашри хабар берди.

Иш материалларига кўра, 17 ёшли ўзбекистонлик ўн тўрт ёшга тўлмаган қизга нисбатан жинсий зўравонлик қилган ва уни таҳқирлаган.

“У қизнинг ночор аҳволидан фойдаланган”, дейилади хабарда.

Йигит Россия Федерацияси Жиноят кодексининг 132-моддаси 4-қисмининг “б” банди (Жинсий характердаги зўравонлик ҳаракатлари) билан айбдор деб топилиб, етти йилга озодликдан маҳрум қилинди. У жазони ахлоқ тузатиш колониясида ўташи, шунингдек жабрланувчининг қонуний вакилига 700 минг рубль тўлаши белгиланди.

Эслатиб ўтамиз, аввалроқ Россияда вояга етмаган қизга шилқимлик қилган ўзбекистонлик эркак 14 йилга озодликдан маҳрум этилганди. 2023 йилнинг август ойида Калининград шаҳрининг Шевченко кўчасидаги уйлардан бирининг ёнида 59 ёшли эркак 11 ёшли қизчани кўриб, унга автобус бекатига йўл кўрсатиш баҳонасида уни меҳмонхона томонга олиб борган. Йўлда унга турли хил шаҳвоний ҳаракатлар қилишга уринган, сўнг унинг юзидан тишлаб, велосипедига ўтириб, қочиб қолган.