Россияда ўзбекистонликлар энди хитойликлар билан муштлашди (видео)

Жорий йилнинг 19 май куни Россиянинг Красноярск шаҳри Ленинский туманида қурилиш ташкилоти ходимлари ўртасида жанжал келиб чиқди. Бу ҳақда Красноярск полиция хизмати хабар берди. 

“112 Красноярск” Telegram-канали берган маълумотга кўра, можаро Хитойнинг “CRCC Rus” (China Railway Construction Corporation Limited) қурилиш компаниясида ишлаётган Хитой ва Ўзбекистон фуқаролари ўртасида келиб чиққан.

Расмийларга кўра, тўқнашувда камида тўрт киши тан жароҳати олиб, тиббий ёрдамга мурожаат қилган. 25 нафар иштирокчи полиция томонидан қўлга олинган.

Билдирилишича, мазкур ҳолат юзасидан Россия Жиноят кодексининг 115-моддаси 2-қисми (енгил тан жароҳати етказиш) бўйича жиноят иши қўзғатилган. Текширув ишлари давом этмоқда.

Расмийлар можаронинг аниқ сабабини ҳали очиқламаган, аммо дастлабки версияларга кўра, келишмовчилик маиший сабаблар билан боғлиқ бўлган. Қурилиш компанияси ҳозирча ҳодиса юзасидан изоҳ бермаган ва можаро иштирокчиларининг иш жойи бўйича маълумотни тасдиқламаган.

Эслатиб ўтамиз, аввалроқ Россиянинг Приморск ўлкасида жойлашган Арсеньев шаҳридаги қурилиш майдонида Шимолий Корея ва Ўзбекистон фуқаролари ўртасида муштлашув содир бўлган эди.