Россия жамоаларини четлатиш Путини ҳайратга солмайди – Ханси Флик

Футбол бўйича Германия терма жамоаси бош мураббийи Ханси Флик Россия термаларининг халқаро мусобақалардан четлатилиши Россия Федерацияси Президенти Владимир Путинни ҳайратга солмайди, деган фикрда. Бу ҳақда “Stren” журнали хабар берди.

Шунингдек, Фликнинг қўшимча қилишича, тақиқлар фақат спортчиларга халақит беради. Аммо ҳозирги вазиятда бундан бошқа йўл йўқ.

“Ўйлашимча, бу [Россия футбол жамоаларини халқаро мусобақалардан четлатиш] тўғри чорадир. Бироқ булар [четлатиш] Путинни ҳайратга солмайди. Ҳатто қаттиқ санкциялар ҳам уни тўхтата олмади. Бу фақат спортчиларга халақит беради, аммо ҳозирги вазиятда бошқа йўл йўқ”, деган Германия терма жамоаси бош мураббийи.

Маълумот ўрнида, Халқаро спорт арбитаж суди UEFА ва FIFА’нинг Россия терма жамоаларини мусобақалардан четлатиш тўғрисидаги қарорини ўз кучида қолдирган.

Россия спортига киритилган чекловлар 

Рус қўшинлари Украинага киргач, Халқаро дзюдо федерацияси (ХДФ) Россия Президенти Владимир Путинни ташкилот фахрий президенти ва элчиси мақомидан маҳрум қилди. 

Польша, Чехия ва Швеция футбол терма жамоаси Жаҳон чемпионатига саралаш доирасида Россия билан ўйинга боришдан бош тортди.

Европа футбол уюшмалари иттифоқи (UEFA) 2022 йилги Европа Чемпионлар лигаси финали Санкт-Петербург шаҳридан Парижга кўчирилганини маълум қилди.

FIFA  ҳамда UEFA Россия терма жамоалари ва клубларини барча футбол мусобақаларидан чиқариб ташлади.

Халқаро баскетбол федерацияси россиялик баскетболчилар ва расмий шахсларни ташкилот шафелигидаги барча мусобақаларда иштирок этишдан четлаштирди.

Дунёдаги энг йирик спорт кийимлари компанияси “Аdidas” Россия футбол жамоалари билан ҳамкорликни тўхтатганини маълум қилди. Шунингдек, Германиянинг "Шальке 04" клуби ва UEFA'нинг ўзи ҳам Россиянинг "Газпром" трансмиллий компанияси билан ҳамкорликни тўхтатди.

Халқаро Паралимпия қўмитаси (IPC) россиялик ва беларуслик атлетларни Пекин-2022 Паралимпия ўйинларидан четлатди.

Шунингдек, 2023 йилда Россиянинг Қозон шаҳрида бўлиб ўтадиган Махсус Олимпиада ўйинлари бекор қилинди.

Маъруф Абдумаликов