Россия ўтган ойда қанча ракета ва дронни уриб туширгани айтилди

Сўнгги бир ой ичида Россия Қуролли Кучлари 159 та HIMARS ракетаси, мингдан ортиқ учувчисиз самолёт ва 13 та қанотли ракетани уриб туширди. Бу ҳақда Россия Мудофаа вазири Сергей Шойгу Россия Қуролли кучлари раҳбарияти билан бўлиб ўтган конференцияда маълум қилди.  

Сергей Шойгунинг айтишича, Украина раҳбарияти янада кўпроқ ҳарбий ва иқтисодий ёрдам олиш учун Ғарбга ўзининг ҳужум ҳаракатларини муваффақиятли кўрсатишга астойдил ҳаракат қилмоқда. Бу эса можаронинг чўзилишига олиб келади.

Унинг сўзларига кўра, энг кескин вазият Запорожье йўналишида ривожланган.

 “Душман стратегик захирадан жанговар бригадаларни олиб келди, уларнинг шахсий таркибига Ғарб инструкторлари раҳбарлигида жанговар йўналишлар бўйича таълим берилди”, деган Шойгу.

Эслатиб ўтамиз, жорий йилнинг 3 сентябрь куни Россия Федерацияси Хавфсизлик кенгаши раиси ўринбосари Дмитрий Медведев йил бошидан бери Россия Қуролли Кучларига 280 мингга яқин киши шартнома асосида ҳарбий хизматга ёлланганини маълум қилганди.