Россия нефтни қайта ишлаш саноати устидан назоратни йўқотди – Трамп

АҚШ Президенти Дональд Трамп Россия Украинадаги уруш туфайли нефтьни қайта ишлаш саноати устидан назоратни йўқотганини билдирди. Бу ҳақда у Truth Social ижтимоий тармоғида ёзди.

“Россия, афсуски, Украина билан уруш туфайли нефтьни қайта ишлаш саноати устидан назоратни йўқотди”, деб ёзган Трамп.

Америка Президентининг сўзларига кўра, Россиядаги кўплаб нефтьни қайта ишлаш заводлари портлатилган ва ҳозирда уларнинг камида бир қисми вақтинча ишламаяпти.

Трамп яна Украинага қарши “бемаъни ва чексиз уруш” тугаши кераклигини қайд этган.

“Бутун дунё азият чекмоқда. Ҳар ой 25 минг киши, асосан аскарлар ҳалок бўлмоқда. Қандай шармандалик!”, деган у.

Трамп жорий ийлнинг 13 сентябрь куни Украина Президенти Владимир Зеленскийни Россиянинг дизель инфратузилмасига зарбалар беришни тўхтатишга чақирган эди. Кремль эса АҚШ Президенти Дональд Трампнинг Украинани Россияда дизель ёнилғиси ишлаб чиқарувчи объектларга ҳужумларни тўхтатишга чақирганини олқишлаганди. Шундан сўнг, Россия ва Украина бир-бирининг энергетика инфратузилмасига зарба беришни тўхтатишга рози бўлгани хабар қилинганди.