Россия НАТО биқинида радиоразведка объекти қурмоқда – ОАВ

Россия НАТО чегарасидан атиги 25 километр узоқликда – Калининград вилоятида улкан радиодатчик (радиоразведка) станцияси барпо этмоқда. Бу ҳақда сунъий йўлдош суратларига таяниб, “Bild” нашри хабар берди. 

Қайд этилишича, қурилиш ишлари 2023 йилнинг март ойида бошланган. Хусусан, ҳудуддаги ўрмонда дарахтлар кесилган, панжара ўрнатилган, йўллар қурилган ва бино учун майдон тайёрланган. “Tochnyi” платформаси маълумотига кўра, бу Черняховск шаҳри яқинида жойлашган ҳалқасимон антеннали мажмуа ҳисобланади.

Суратларда антенна устунлари учун кавланган чуқурлар ва камида олтита ҳалқа кўринади. Мутахассисларнинг фикрича, бу “ҳалқасимон антеннали панжара” бўлиб, у ҳарбий радиотехник разведка ва алоқа учун хизмат қилади. Объект диаметри 1600 метргача етиши мумкин, бу одатий комплекслардан бир неча баробар катта.

Экспертларнинг таъкидлашича, қурилиш тугагач, Россия НАТОнинг Шарқий Европа ва Болтиқбўйидаги радиомулоқотларини тутиб олиши ҳамда Болтиқ денгизи ва Шимолий Атлантикадаги сувости кемалари билан янада барқарор алоқа ўрнатиши мумкин бўлади.

Эслатиб ўтамиз, аввалроқ Шимолий Корея Хитой чегарасига яқин ҳудудда мамлакатнинг энг замонавий стратегик қуроллари жойлаштирилган махфий ракета базасини қургани хабар қилинганди.