Россия Марказий Осиё футбол ассоциацияси турнирида иштирок этади

Россия терма жамоаси 9–21 июнь кунлари Бишкек ва Тошкент шаҳарларида бўлиб ўтадиган Марказий Осиё футбол ассоциацияси (CAFA) чемпионатида иштирок этади. Бу ҳақда 13 март куни Тожикистон футбол федерацияси матбуот хизмати хабар берди.

2014 йилда ташкил этилган CAFA Осиё Футбол Конфедерациясининг (ОФК) бешта минтақавий ассоциациясидан бири ҳисобланади. CAFA чемпионатида Россия терма жамоасидан ташқари Тожикистон, Эрон, Ўзбекистон, Қирғизистон, Туркманистон, Афғонистон иштирок этади.

Шунингдек, чемпионатда қайд этилган натижалар Халқаро футбол федерацияси (FIFA) рейтингига ҳам таъсир ўтказади. Форматга кўра, саккизта жамоа тўрттадан иккита гуруҳга бўлинади, тўртлик ғолиблари финалда ўйнайди, иккинчи натижа кўрсатган жамоалар учинчи ўрин учун баҳсда тўқнаш келади.

28 февраль куни FIFA ва Европа футбол ассоциациялари иттифоқи (UEFA) Россия ва Украина атрофида вазият кескинлашгани муносабати билан Россия клублари ва терма жамоаларини халқаро мусобақаларда иштирок этишини тақиқлади. Шундан сўнг Россия терма жамоаси CAFA аъзоси бўлган миллий терма жамоаларга қарши учта ўртоқлик учрашуви ўтказди. Сентябрда россиялик футболчилар Бишкекда Қирғизистон (2:1), ноябрда Душанбеда Тожикистон (0:0) ва Тошкентда Ўзбекистон (0:0) билан ўйин ўтказди.